മെഡിസെപ് സർക്കാർ ജീവനക്കാർ വെട്ടിലോ

വിവിധ പ്രശ്നങ്ങൾ മൂലം പോളിസിയിൽനിന്നും പിൻമാറാനുള്ള ഓപ്ഷൻ വേണമെന്ന ആവശ്യം ശക്തമാകുന്നു

- ബാലകൃഷ്ണൻ തൃക്കങ്ങോട്

സംസ്ഥാന സർക്കാർ ജീവനക്കാർക്കും പെൻഷൻകാർക്കും സാന്ത്വനം പകരേണ്ട മെഡിസെപ് പദ്ധതി ഉപയോക്താക്കൾക്ക് കൂടുതൽ ബാധ്യതയാകുന്നു. ആരംഭിച്ച് ഒന്നരവർഷം പിന്നിടുമ്പോൾ വാഗ്ദാനം ചെയ്ത മിക്ക ആനുകൂല്യങ്ങളും കടലാസിൽ മാത്രം. നിലവിലുണ്ടായിരുന്ന ഹെൽത്ത് പോളിസി ഉപേക്ഷിച്ച് മെഡിസെപ് സ്വീകരിക്കാൻ നിർബന്ധിതരായ ജീവനക്കാരും പെൻഷൻകാരും വെട്ടിലായിരിക്കുകയാണ്.

നൽകാത്ത സുരക്ഷയ്ക്ക് പണം

ഇപ്പോൾ ജോലി കിട്ടിയവരും പദ്ധതി ആരംഭിച്ച 2022 ജൂലൈ മുതലുള്ള 18 മാസത്തെ പ്രീമിയം 9,000 രൂപ നിർബന്ധമായി കൊടുക്കണം. തുടർന്ന് അതതു മാസത്തെ 500 രൂപയും നൽകണം. അതായതു കഴിഞ്ഞ ഒന്നര വർഷത്തിനിടയിൽ കിട്ടാത്ത സുരക്ഷയ്ക്കാണ് പണം വാങ്ങുന്നത്. ഇത് അന്യായമല്ലേ എന്നാണു ചോദ്യം. ഒരിക്കലും ലഭിക്കാത്ത സേവനത്തിന് ഫീസ് ഈടാക്കുന്നത് കോടതികളിൽ ചോദ്യം ചെയ്യപ്പെടാം.

മുൻകൂറായി നൽകുന്നുവെന്നു സർക്കാർ

മെഡിസെപ്പിന്റെ കാലാവധി മൂന്നു വർഷമാണെന്നും ഇക്കാലയളവിലെ പ്രീമിയം മുഴുവൻ അടച്ചാലേ ആനുകൂല്യങ്ങളെല്ലാം ലഭിക്കൂ എന്നാണ് സർക്കാറിന്റെ നിലപാട്. ഒരു വർഷം സർക്കാർ സർവീസിൽ പ്രതീക്ഷിക്കുന്ന നിയമനങ്ങളുടെ എണ്ണം കൂടി കണക്കാക്കിയാണ് പ്രീമിയം നിശ്ചയിച്ചിരിക്കുന്നത്. മാത്രമല്ല, മാരകരോഗത്തിനും അവയവമാറ്റ ശസ്ത്രക്രിയയ്ക്കുമായുള്ള കോർപസ് ഫണ്ടിന്റെ ആനുകൂല്യം പുതിയ ജീവനക്കാർക്കും നൽകണമെന്നതിനാൽ മുഴുവൻ പ്രീമിയവും ഈടാക്കിയേ പറ്റൂ. പുതിയവർക്ക് ഇതു വേണ്ടെന്നു വയ്ക്കാനും വ്യവസ്ഥയില്ല. എന്നാൽ ഇത്തരക്കാർക്ക് പ്രീമിയം തവണകളായി അടയ്ക്കാമെന്ന് അധികൃതർ വ്യക്തമാക്കുന്നു.

തിമിരം കണ്ണു തുറക്കാതെ കമ്പനി