ക്രിപ്റ്റോ കറൻസിയല്ല ഡിജിറ്റൽ രൂപ

കേന്ദ്രീകൃത സംവിധാനത്തിലൂടെ മൂല്യത്തിന് റിസർവ് ബാങ്ക് പിന്തുണ നൽകുന്ന ഇന്ത്യയുടെ പരമാധികാര കറൻസി എന്ന നിലയിൽ ഡിജിറ്റൽ റുപ്പിയെ ക്രിപ്റ്റോ കറൻസിയുടെ ഗണത്തിൽപെടുത്താനാവില്ല.

- സി.എസ്. രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

റിസർവ് ബാങ്ക് ഓഫ് ഇന്ത്യ ഡിജിറ്റൽ കറൻസി നടപ്പാക്കുന്ന നടപടികൾ പരീക്ഷണാടിസ്ഥാനത്തിൽ ആരംഭിച്ചു. എന്നാൽ, ഇത് ഇന്ത്യയിലും ക്രിപ്റ്റോ കറൻസികൾ നിയമ വിധേയമാക്കാനുള്ള ആദ്യ നടപടികളാണെന്നു ചിലർക്കെങ്കിലും ഒരു തോന്നലുണ്ട്. തെറ്റിദ്ധരിക്കേണ്ട, ക്രിപ്റ്റോ കറൻസികളുടെ കൂട്ടത്തിൽ പെടുത്താവുന്നവയേ അല്ല ഡിജിറ്റൽ കറൻസി. ഡിജിറ്റൽ കറൻസികളുടെ സാങ്കേതികവിദ്യ, രൂപകൽപന, ഉപയോഗം തുടങ്ങിയവ സംബന്ധിച്ച വിശദമായ ആശയക്കുറിപ്പ് റിസർവ് ബാങ്ക് തന്നെ പുറപ്പെടുവിച്ചിട്ടുണ്ട്.

ഡിജിറ്റൽ റുപ്പി എന്നാൽ

"e' എന്ന അടയാളം നൽകി, സിബിഡിസി എന്ന ചുരുക്കപ്പേരിൽ സെൻട്രൽ ബാങ്ക് അവതരിപ്പിക്കുന്ന ഡിജിറ്റൽ കറൻസിയാണ് ഡിജിറ്റൽ രൂപ അഥവാ ഇ-രൂപ . സാധാരണ കറൻസി പോലെ തന്നെ, ആർബിഐ പുറപ്പെടുവിക്കുന്ന ഔദ്യോഗിക കറൻസിയുടെ ഡിജിറ്റൽ രൂപമാണ് ഡിജിറ്റൽ രൂപ. പരമാധികാര രാഷ്ട്രമെന്ന നിലയിൽ ഔദ്യോഗികമായി റിസർവ് ബാങ്ക് പുറപ്പെടുവിക്കുന്ന കടലാസ് പണം പോലെ കേന്ദ്രീകൃതമായി  പുറപ്പെടുവിക്കുന്ന സ്വതന്ത്രമായി കൈമാറ്റം ചെയ്യാവുന്നവയാണ് ഡിജിറ്റൽ കറൻസികളും വ്യക്തികൾ തമ്മിലും സ്ഥാപനങ്ങൾ തമ്മിലും വ്യക്തികളും സ്ഥാപനങ്ങളും തമ്മിലും ഇടപാടു നടത്താനും നിർബാധം പണം കൈമാറ്റം ചെയ്യാനും ഉപയോഗിക്കാം.

റിസർവ് ബാങ്കിന്റെ 500, 100 രൂപ നോട്ടുകളുടെയും നാണയങ്ങളുടെയും അതേ മൂല്യങ്ങളിൽ തന്നെ ഡിജിറ്റൽ കറൻസിയും ലഭ്യമാക്കും. നോട്ടുകൾ പോലെ വിശ്വാസത്തോടെയും സുരക്ഷിതമായും പണം കൈമാറ്റം പൂർത്തിയാക്കാം. കറൻസി പോലെ പെട്ടിയിൽ പൂട്ടിവച്ചാൽ ഡിജിറ്റൽ രൂപയ്ക്കും പലിശ ലഭിക്കില്ല ഡിജിറ്റൽ രൂപ സാധാരണ കറൻസിയാക്കി മാറ്റാനും ബാങ്കുകളിലും മറ്റും നിക്ഷേപിക്കാനും തടസ്സമില്ല.