ചെമ്മീൻ വളർത്താൻ ഡയാറ്റം വരുമാനം പെരുകാൻ വനാമി

60 സെന്റിൽ നാലാം മാസം 4 ലക്ഷം ലാഭം

- 

ഉപ്പുവെള്ളം കിട്ടുന്ന 50 സെന്റ് സ്ഥലമുണ്ടെങ്കിൽ 3- 4 മാസത്തിനകം 4 ലക്ഷം രൂപയോളം ലാഭം നേടാം. എറണാകുളം പളളുരുത്തിയിലെ കുതിരക്കൂർക്കരിയിൽ അക്വാ ഓറ ചെമ്മീൻ ഫാം നടത്തി മികച്ച വിളവു നേടിയ ആത്മവിശ്വാസത്തിലാണ് എറണാകുളം കലൂർ സ്വദേശി എം.എം. നിഖിൽ ഇതു പറയുന്നത്. പുത്തൻ സാങ്കേതിക വിദ്യയായ ഡയാറ്റം അധിഷ്ഠിത ചെമ്മീൻ കൃഷിയിലൂടെയാണ് ഈ നേട്ടം.

ഹൈടെക് അക്വാകൾചറിൽ മുൻപരിചയമില്ലാത്ത സ്ഥലമുടമ കുഞ്ഞമ്മ സെബാസ്റ്റ്യനു വേണ്ടി പരിശീലകന്റെ റോളിലാണ് നിഖിൽ ഇവിടെ കൃഷി നടത്തിയത്. ഹൈടെക് കൃഷിയുടെ സാങ്കേതികവശങ്ങൾ അറിയാത്ത വർക്ക് നിശ്ചിത ഉൽപാദനവും ആദായവും ഉറപ്പാക്കി വിളവെടുത്തു നൽകുകയാണ് പരിശീലകൻ എന്ന നിലയിൽ താൻ ചെയ്യുന്നതെന്ന് നിഖിൽ പറഞ്ഞു. ഫാം നിർമാണത്തിന്റെയും കൃഷിയുടെയും ചെലവ് പൂർണമായും ഫാം ഉടമ തന്നെ വഹിക്കുന്നു. ലാഭനഷ്ടങ്ങൾ എത്രയായാലും പരിശീലകനു നിശ്ചിത ഫീസ് മാത്രം.