ഒരു പശുവിൽ തുടക്കം ഒന്നര ലക്ഷം രൂപ ലാഭം

എൻജിനീയറിങ്ങിലും ഡെയറി ഫാമിങ്ങിലും ഒരുപോലെ നേട്ടമുണ്ടാക്കുന്ന കൊല്ലത്തെ യുവകർഷകൻ

- 

പ്രവാസജീവിതത്തിനു ശേഷം നാട്ടിൽ സംരംഭം തുടങ്ങാൻ തുനിഞ്ഞവരിൽ പലരും താൽപര്യപ്പെട്ടത് ഡെയറി ഫാമിലാണ്. യുട്യൂബിൽ കണ്ട വിദേശഫാമുകളായിരുന്നു മിക്കവരുടെയും ആവേശം. അങ്ങനെ തുടങ്ങിയവരിൽ വിജയിച്ചവരെക്കാൾ വളരെയേറെയുണ്ട് പരാജിതർ. വിജയിച്ചവരുടെ കൂട്ടത്തിലാണ് കൊല്ലം കൊട്ടാരക്കരയ്ക്ക് ടുത്ത് നെല്ലിക്കുന്നത്തുള്ള ടോബിൻ തങ്കച്ചൻ.

കൊല്ലം ടികെഎം എൻജിനീയറിങ് കോളജിൽ പഠിച്ച്, സൗദി അരാംകോയിൽ ജോലി നേടിയ കാലത്ത് ഒഴിവു സമയങ്ങളിൽ യുട്യൂബിലെ കൃഷി വിഡിയോകളായിരുന്നു ടോബിന്റെയും നേരമ്പോക്ക്. കൃഷികുടുംബത്തിൽ ജനിച്ച ടോബിന് നാട്ടിൽ കാർഷികസംരംഭം തുടങ്ങണമെന്ന് ആഗ്രഹവുമുണ്ടായിരുന്നു. വിദേശം വിട്ട് 2017ൽ നാട്ടിലെത്തി കൺസ്ട്രക്ഷൻ സംരംഭവുമായി മുന്നോട്ടു പോകവേ, കൃഷിക്കു പറ്റിയ ഒന്നേകാലേക്കർ സ്ഥലം വാങ്ങിയിട്ടു. സ്ഥിരം തൊഴിലാളിയെ കണ്ടെത്തി, ഫലവൃക്ഷങ്ങൾ നട്ടുവളർത്തി കൃഷിയിടം പാകപ്പെടുത്തുന്ന കാലത്താണ് കോവിഡ് വരുന്നത്. നിർമാണമേഖല സ്തംഭിച്ച് വീട്ടിലിരുന്നപ്പോൾ വീട്ടാവശ്യത്തിനു പാലിനായി ഒരു പശുവിനെ വാങ്ങി.

കോവിഡ് കാലത്ത് എവിടെത്തിരിഞ്ഞു നോക്കിയാലും കൃഷിക്കാരായിരുന്നല്ലോ. ടോബിൻ പക്ഷേ കോവിഡ് കഴിഞ്ഞിട്ടും കൃഷിയും പശുവളർത്തലും നിർത്തിയില്ല. ഫാമിന്റെ ചുറ്റുവട്ടത്തുള്ളവർ ഫാം ഫ്രഷ് പാലിനു താൽപര്യപ്പെട്ടതോടെ 2 പശുക്കളെക്കൂടി വാങ്ങി. ഒന്നര വർഷം കൊണ്ട് 17 പശുക്കളായി. ടോബിന്റെ ഫാമിൽ ഇന്ന് കറവപ്പശുക്കളുടെ എണ്ണം 47. ദിവസം ശരാശരി പാലുൽപാദം 600 ലീറ്റർ. എല്ലാ ചെലവും കിഴിച്ച് മാസലാഭം ഒന്നര ലക്ഷം രൂപ. ഒരേ മികവിൽ 2 സംരംഭങ്ങൾ നയിക്കുകയാണ് ഇപ്പോൾ ഈ യുവകർഷകൻ; ബെഥേൽ ബിൽഡേഴ്സും ബെഥേൽ ഡെയറി ഫാമും.

വളർത്തുചെലവു കുറയ്ക്കണം