കാലാവസ്ഥമാറ്റം ചെറുക്കുന്ന പുതിയ വിളയിനങ്ങൾ

പ്രധാനമന്ത്രി നരേന്ദ്ര മോദി ഈയിടെ പുറത്തിറക്കിയ 109 വിളയിനങ്ങളിൽ കേരളത്തിനു യോജിച്ചവ അടുത്തറിയാം

- ഡോ. ജോസ് ജോസഫ്

കാർഷിക മേഖലയിൽ ഉൽപാദനക്ഷമതയും കാലാവസ്ഥമാറ്റ പ്രതിരോധശേഷിയും വർധിപ്പിക്കുന്നതിന്റെ ഭാഗമായി കഴിഞ്ഞ ഓഗസ്റ്റ് 11 ന് 109 വിത്തിനങ്ങൾ പ്രധാനമന്ത്രി നരേന്ദ്ര മോദി പുറത്തിറക്കി. 61 വിളകളിലായാണ് ഈ 109 ഇനങ്ങൾ. ഇവയിൽ ധാന്യ വിളകൾ, പയറുവർഗങ്ങൾ, എണ്ണക്കുരുക്കൾ തുടങ്ങിയ വയൽ വിളകളുടെ 69 ഇനങ്ങളും പഴം, പച്ചക്കറികൾ, പൂക്കൾ തുടങ്ങിയ ഹോർട്ടികൾചർ വിളകളുടെ 40 ഇനങ്ങളും ഉൾപ്പെടും. പ്രതികൂല കാലാവസ്ഥയിൽ, വിശേഷിച്ച് വരൾച്ച ബാധിത പ്രദേശങ്ങളിൽ കൃഷി ചെയ്യാൻ യോജ്യമാണ്. ഇന്ത്യൻ കാർഷിക ഗവേഷണ കൗൺസി ലിനു കീഴിലുള്ള വിവിധ ഗവേഷണ സ്ഥാപനങ്ങൾ വികസിപ്പിച്ചെടുത്ത ഈ ഇനങ്ങളിൽ കേരളത്തിൽ കൃഷി ചെയ്യാവുന്നവ പരിചയപ്പെടാം.

നാളികേരം

കൽപ സുവർണ കാസർകോട് കേന്ദ്ര തോട്ടവിള ഗവേ ഷണസ്ഥാപനം വികസിപ്പിച്ചെടുത്തത്. ഉൽപാദനശേഷി കൂടിയ കുറിയ ഇനം. മധുരമുള്ള ഇളനീരും ഗുണമേന്മയേറിയ കൊപ്രയും. സംസ്കരണത്തിനു യോജ്യം. നേരത്തേ കായ്ക്കുന്നു. നട്ട് 30 - 36 മാസം കൊണ്ട് പുഷ്പിച്ചു തുടങ്ങും. തേങ്ങയ്ക്ക് പച്ചനിറം. ശരാശരി വിളവ് ഒരു വർഷം ഒരു തെങ്ങിൽനിന്ന് 97 തേങ്ങ. നന്നായി പരിപാ ലിച്ചാൽ 108 -138 എണ്ണം വരെ. ഒരു തേങ്ങയിൽ 431 മില്ലി ലീറ്റർ ഇളനീര്.