മണിപോലെ പൂക്കളുള്ള ചെമ്പരത്തി ചൈനീസ് ലാൻടേൺ

പുതിയ ഇനം പൂച്ചെടിയായതിനാൽ തൈകൾ ഉൽപാദിപ്പിച്ച് ഓൺലൈൻ വിപണനം വഴി വരുമാനം നേടാനുമാവും.

-  ജേക്കബ് വർഗീസ് കുന്ത Cons: 9447002211 Youtube Channel: JACOBINTE UDHYANAM

ചെമ്പരത്തിയും മുളകു ചെമ്പരത്തിയും വൈസ്രോയി ചെമ്പരത്തിയും എല്ലാം നമുക്കു സുപരിചിതം. എന്നാൽ, ഇവയുടെ വർഗത്തിൽപെട്ട ചൈനീസ് ലാൻ ടേൺ' (CHINESE LANTERN) ഇനം നമുക്കു പുതുമയാണ്. "അബൂട്ടിലോൺ പിം' എന്ന ശാസ്ത്രനാമമുള്ള ഈ പൂച്ചെടിയുടെ വിവിധതരം പൂക്കളുള്ള ഇനങ്ങൾ നമ്മുടെ നാട്ടിലെ ഉഷ്ണമേഖലാ കാലാവസ്ഥയിൽ നന്നായി വളരുകയും പുഷ്പിക്കുകയും ചെയ്യും. ഓറഞ്ച്, വെള്ള, മഞ്ഞ, ചുവപ്പ് തുടങ്ങിയ നിറങ്ങളിലെല്ലാം പൂക്കളുള്ള ഇനങ്ങൾ ഇന്നു വിപണിയിൽ ലഭ്യവുമാണ്. ഇവയിൽ ഓറഞ്ച് പൂക്കളുടെ ഇതളുകളിൽ നിറയെ ഞരമ്പുകൾപോലെ ചുവപ്പുവരകളുമായി കാണാൻ അതിസുന്ദരം. മഞ്ഞ പൂക്കൾ ഉള്ള ഇനത്തിന്റെ ഇലകൾക്ക് ഇളം മഞ്ഞയും പച്ചയും ഇടകലർന്ന നിറമാണ്. ഈ ഇനം വളരുന്നതും പൂവിടുന്നതും സാവധാനമാണെങ്കിലും പൂവിടാക്കാലത്തും ചെടി കാണാൻ വേറിട്ട ഭംഗിയാണ്. പൂച്ചെടിയായി അതിരുവേലി ഒരുക്കാനും ചട്ടിയിൽ വളർത്താനും ഒരുപോലെ പറ്റിയതാണ് അബൂട്ടിലോൺ. തറനിരപ്പിൽനിന്ന് ഉയരത്തിൽ തയാറാക്കിയ പ്ലാന്റർ ബെഡിൽ വളർത്തിയാൽ ഞാന്നു കിടക്കുന്ന പൂക്കൾക്ക് കൂടുതൽ നോട്ടം കിട്ടും. നമ്മുടെ നാട്ടിലെ വിപണിയിൽ പുതുതായി വന്നെത്തിയ പൂച്ചെടിയിനമായതിനാൽ തൈകൾ ഉൽപാദിപ്പിച്ച് ഓൺലൈൻ വിപണനം ചെയ്ത് വരുമാനമുണ്ടാക്കാനും സാധ്യതയേറെ.