കൃഷിയിടത്തിലുണ്ടാക്കാം ജീവാണുവളങ്ങൾ

കർഷകർക്ക് സ്വന്തം കൃഷിടങ്ങളിൽത്തന്നെ കുറഞ്ഞ ചെലവിൽ ട്രൈക്കോഡെർമയും സ്യൂഡോമോണാസും ഉൽപാദിപ്പിക്കുന്നതിനുള്ള സാങ്കേതികവിദ്യ തയാർ

- എം. രാഹുൽ രാജ്

ജീവാണുവളങ്ങളായ ട്രൈക്കോഡെർമയും സ്യൂഡോ മോണാസും രോഗ, കീടനിയന്ത്രണത്തിനു വളരെ ഫലപ്രദമാണ്. എന്നാൽ പലപ്പോഴും അവയുടെ ലഭ്യതക്കുറവ് പ്രശ്നമാകാറുണ്ട്. ഗുണമേന്മയും കുറയാം. ഈ പോരായ്മകൾ പരിഹരിക്കാൻ കർഷകർക്ക് സ്വന്തം കൃഷിയിടങ്ങളിൽത്തന്നെ കുറഞ്ഞ ചെലവിൽ ട്രൈക്കോഡെർമയും സ്യൂഡോമോണാസും ഉൽപാദിപ്പിക്കുന്നതിനുള്ള സാങ്കേതികവിദ്യ തയാർ. ഹൈദരാബാദിലെ നാഷനൽ ഇൻസ്റ്റിറ്റ്യൂട്ട് ഓഫ് പ്ലാന്റ് ഹെൽത്ത് മാനേജ്മെന്റ് (NIPHM) വികസിപ്പിച്ചെടുത്ത സാങ്കേതികവിദ്യ പരീക്ഷണാടിസ്ഥാനത്തിൽ പാലക്കാട് ജില്ലയിലെ കൊല്ലങ്കോട്, ആലത്തൂർ, ചിറ്റൂർ ബ്ലോക്കുകളിൽ ഉപയോഗിച്ചുവരുന്നു.

ഒരു ഗ്രാം ജീവാണുവിൽ ഏകദേശം 20 ലക്ഷം CFU (കോളനി ഫോമിങ് യൂണിറ്റ്) എന്നതാണ് ആ ജീവാണുവി ന്റെ പ്രവർത്തനക്ഷമത നിർണയിക്കുന്നത്. ഈ സാങ്കേതിക വിദ്യ ഉപയോഗിച്ച് കർഷകർക്കു തന്നെ 100% പ്രവർത്തന ക്ഷമതയുള്ള ട്രൈക്കോഡെർമയും സ്യൂഡോമോണാസും ഉൽപാദിപ്പിക്കാം. ഇലപ്പുള്ളി, വേരുചീയൽ, ചൂർണപ്പൂപ്, മൃദുരോമപ്പൂപ്, വാട്ടം തുടങ്ങി എല്ലാ രോഗങ്ങളെയും ഈ ജീവാണുക്കൾക്കു നിയന്ത്രിക്കാനാവും. രോഗനിയന്ത്രണത്തിനുപരി മണ്ണിന്റെ പോഷകമൂല്യം വർധിപ്പിക്കുന്നുമുണ്ട് ഈ ജീവാണുക്കൾ.