ചതിക്കില്ല ചാണകം

ചാണകപ്പൊടി, പാചകവാതകം, പാലിന്റെ മൂല്യവർധിത ഉൽപന്നങ്ങൾ 

- 

പശു വളർത്തുന്നവരെ പലപ്പോഴും വെട്ടിലാക്കുന്നത് ചാണകമാണ്. ചാണകം നീക്കുന്നത് ഒരു ദിവസം മുടങ്ങിയാൽ പോലും ഡെയറി ഫാമുകൾ ആകെ അവതാളത്തിലാകും. ചാണക്കുഴിയും പ്രശ്നം തന്നെ. കൊതുകും ഈച്ചയും ദുർഗന്ധവും നിറഞ്ഞ ചാണകക്കുഴികൾ പലപ്പോഴും പരിസരവാസികളുടെ പരാതിക്ക് കാരണമാകാറുണ്ട്. വിപുലമായ പുരയിടവും കൃഷിയുമുള്ളവർക്കു ചാണകം കൈകാര്യം ചെയ്യൽ പ്രശ്നമാകില്ലെങ്കിലും പത്തും പതിനഞ്ചും സെന്റിൽ പശുക്കളെ വളർത്തുന്നവർക്ക് അതു വലിയ തലവേദന തന്നെ. തിരുവനന്തപുരം നഗരനടുവിൽ പൂജപ്പുരയിൽ 17 വർഷമായി 22 സെന്റ് സ്ഥലത്ത് മുപ്പതോളം പശുക്കളെ പരിപാലിക്കുന്ന ശ്രീവസന്തം വീട്ടിൽ വി. ഈശ്വരിക്കു പക്ഷേ, ചാണകം പ്രശ്നമേയല്ല. പാലിനെക്കാൾ വരുമാനം ചാണകത്തിലൂടെ തനിക്കു ലഭിക്കുന്നുണ്ടെന്നും ഈശ്വരി പറയുന്നു.