അവിട്ടത്തൂരിലെ വേറിട്ട പൂന്തോട്ടം

ഓർക്കിഡുകളും പൂവള്ളിച്ചെടികളും മാത്രം ഉൾപ്പെടുത്തിയ ഉദ്യാനത്തിൽ എന്നും പൂക്കാലം

- ജേക്കബ് വർഗീസ് കുന്തറ  ഫോൺ: 9447002211

ഇരിങ്ങാലക്കുട, അവിട്ടത്തൂർ, അപൂക്കൻ തരകൻപറമ്പിൽ ആനി സെബാസ്റ്റ്യന്റെ വീടിന്റെ പൂമുഖത്ത് എന്നും പൂക്കളുടെ പൂരമാണ്. നൂറുകണക്കിന് ഓർക്കിഡുകളും നാനാജാതി വള്ളിച്ചെടികളുമെല്ലാം കുലകുത്തി പൂവിട്ടുനിൽക്കുന്നത് ഏത് ഉദ്യാന പ്രേമിയുടെയും മനസ്സിനു കുളിരേകും കാഴ്ചയാണ്.ആനിക്കു പൂച്ചെടികളോടുള്ള പ്രണയം പൂത്തുവിടർന്നതാണ് ഈ വർണ വിസ്മയം.

ഓർക്കിഡുകളും വള്ളിച്ചെടികളും മാത്രമായി വേറിട്ട രീതിയിൽ ഒരുക്കിയതാണ് ഈ ഉദ്യാനം. പേരക്കുട്ടികൾക്ക് ഓടിച്ചാടിക്കളിക്കാൻ ഉദ്യാന മധ്യേ ആവശ്യത്തിനു സ്ഥലം നൽകി അരികിൽ ചട്ടികളിലാണ് ഓർക്കിഡ് ചെടികൾ വളർത്തുന്നത്. വള്ളിച്ചെടികളാവട്ടെ, പ്രത്യേകം തയാറാക്കിയ ട്രെല്ലിസിലും പെർഗോളയിലും.

ഡെൻഡ്രോബിയം, മൊക്കാറ, ടെ റേറ്റ് വാൻഡ, ബാസ്കറ്റ് വാൻഡ, ഫലനോപ്സിസ്, അസ്കോ സെൻട്രം തുടങ്ങി പലയിനങ്ങളുണ്ടെങ്കിലും ആനിക്കു കൂടുതൽ പ്രിയം ഡെൻഡ്രോബിയത്തോടാണ്. ഉദ്യാനത്തിന് ഇത്ര കണ്ട് മോടി നൽകുന്നതും ഇരുനൂറിലേറെ ഇനങ്ങളിലുള്ള രണ്ടായിരത്തോളം ഡെൻഡ്രോബിയങ്ങളാണ്.ഈ ശേഖരത്തിൽ ലെസിയാൻ, കോംപാക്റ്റം, ഡോൺമാരി വർഗങ്ങളിലെ വിവിധ ഇനങ്ങളും ഉൾപ്പെടുന്നു. ഇവയിൽ ലെസിയന്ത്രയാണ് മറ്റു ഡെൻഡ്രോബിയം ഇനങ്ങളെ അപേക്ഷിച്ച് നന്നായി പൂവിടുന്നതും ചെടിയിൽ പൂക്കൾ കൂടുതൽ നാൾ കൊഴിയാതെ നിൽക്കുന്നതും. ഓർക്കിഡ് ചെടികൾ എല്ലാം നേരിട്ടുള്ള വെയിലിനോടും മഴയോടും പൊരുത്തപ്പെട്ട് കരുത്തോടെ വളരുന്നു.