പ്രതിനായകന്റെ വേഷ പകർച്ചകൾ

അഭിനയത്തിന്റെ ഇന്നലെകളെ കുറിച്ചല്ല, ഏറ്റവും പുതിയ മമ്മൂട്ടിവേഷങ്ങളാണ് നമ്മുടെ ചർച്ചകളിൽ നിറയുന്നത്

- ഗിരീഷ് ദാമോദർ

ഹിമാലയം ആദ്യമായി നേരിൽ കണ്ടപ്പോൾ മലയാളത്തിലെ മുതിർന്ന ഒരു കവി പറഞ്ഞതായി കേട്ടിട്ടുണ്ട്: "ഇത്രയൊക്കെ കവിതകൾക്കും ലേഖനങ്ങൾക്കും പുസ്തകങ്ങൾക്കും വിഷയമായിട്ടും ഇപ്പോഴും ഹിമാലയം അതേ പ്രൗഢിയിൽ അവിടെത്തന്നെ ഉണ്ടല്ലോ എന്നതാണ് അതിശയം മമ്മൂട്ടി എന്ന മഹാനടനും ഈ കവിവാക്യം ചേരും എന്ന് തോന്നിയിട്ടുണ്ട്. മമ്മൂട്ടിയെ കുറിച്ച് പുറത്തുവന്ന പുസ്തകങ്ങളും പഠനങ്ങളും അനേകമാണ്. ആനുകാലികങ്ങളിൽ എഴുതപ്പെട്ട എണ്ണാനാവാത്ത അക്ഷരങ്ങൾ വേറെയും... അങ്ങനെയുള്ള ഒരു നടനെ അക്ഷരങ്ങൾ കൊണ്ട് സ്പർശിക്കുമ്പോൾ കൈ വിറയ്ക്കുന്നത് സ്വാഭാവികം.