മനസുകളുടെ ഹൃദയം തൊട്ടറിയുന്ന ആഘോഷം

മലയാളത്തിന് സൂപ്പർഹിറ്റ് സിനിമകൾ സമ്മാനിച്ച സംവിധായകൻ ഷാജി കൈലാസിന്റെ മകൻ റുഷിൻഷാജി കൈലാസും, തിരക്കഥാകൃത്തും, അഭി നേതാവുമായ രഞ്ജിപണിക്കരുടെ മകൻ നിഖിൽ രഞ്ജിപണിക്കരും ആഘോഷത്തിൽ ശ്രദ്ധേയമായ കഥാപാത്രങ്ങളെ അവതരിപ്പിക്കുന്നുണ്ട്

- എം.എസ്. ദാസ് മാട്ടുമന്ത

പാലക്കാട് ജില്ലയിലെ പ്രശസ്തമായ കലാലയങ്ങളിലൊന്നാണ് മുണ്ടൂരിലെ യുവ ക്ഷേത്ര കോളേജ്. പശ്ചിമഘട്ടത്തിലെ കല്ലടിക്കോടൻ മലനിരകളുടെ പശ്ചാത്തലത്തിലുള്ള മനോഹരമായ ഈ കലാലയത്തിന്റെ പ്രൗഢിയും സൗന്ദര്യവും ബിഗ് സ്ക്രീനിലേക്കെത്തുകയാണ്.

പൂർണ്ണമായും കോളേജ് ക്യാമ്പസ്സിന്റെ കഥ പറയുന്ന അമൽ കെ. ജോബി രചനയും സംവിധാനവും നിർവ്വഹിക്കുന്ന ആഘോഷം എന്ന സിനിമയുടെ ചിത്രീകരണമാണ് ഈ കോളേജിൽ പുരോഗമിക്കുന്നത്. ചിത്രീകരണത്തിന്റെ അവസാനഘട്ടത്തിലാണ് മുണ്ടൂരിലെ യുവക്ഷേത്ര കോളേജിലെത്തിയത്. കോളേജിലെ വിദ്യാർത്ഥികളെക്കൂടി ഉൾപ്പെടുത്തിയുള്ള ഗാനചിത്രീകരണമാണ് ഇവിടെ നടക്കുന്നത്.

ചിത്രത്തിലെ കേന്ദ്രകഥാപാത്രമായ നരേൻ, നായികയായ റോസ്മിൻ, മുണ്ടൂരിൽ ജനിച്ചുവളർന്ന ഷാജു ശ്രീധർ ഉൾപ്പെടെ വളരെ വലിയൊരു താരനിര സെറ്റിലുണ്ട്. സംവിധായകൻ അമൽ കെ. ജോബിയുടെ നിർദ്ദേശമനുസരിച്ച് ഛായാഗ്രാഹകൻ റോജോ തോമസ് ഓരോ സീനുകളും ക്യാമറയിലേക്ക് പകർത്തുകയാണ്. യുവക്ഷേത്ര കോളേജിൽ ആദ്യമായി സിനിമാചിത്രീകരണം നടക്കുന്നതിനാൽ വിദ്യാർത്ഥികളും, അധ്യാപകരും ഏറെ ആഹ്ലാദത്തിലായിരുന്നു.

ചിത്രത്തിന്റെ നിർമ്മാതാവ് കൂടിയായ ലിസ്സി കെ. ഫെർണാണ്ടസിന്റെ കഥയ്ക്ക് സംവിധായ കൻ അമൽ കെ. ജോബി രചന നിർവ്വഹിച്ച ചിത്രം കൂടിയാണ് ആഘോഷം. ഗുമസ്തൻ എന്ന സിനിമയ്ക്കുശേഷമുള്ള അമൽ കെ. ജോബിയുടെ രണ്ടാമത്തെ ചിത്രമാണിത്. മലയാളത്തിൽ ക്യാമ്പസ്സിനെ ഇതിവൃത്തമാക്കി നിരവധി സിനിമകൾ പുറത്തിറക്കിയിട്ടുണ്ടെങ്കിലും വ്യത്യസ്തമായ പ്രമേയമുള്ള ചിത്രമാണ് ആഘോഷമെന്ന് അണിയറപ്രവർത്തകർ സാക്ഷ്യപ്പെടുത്തുന്നു.