മലയാളിപ്പെണ്ണേ ...

കാര്യസ്ഥൻ എന്ന ചിത്ര ത്തിലെ മലയാളിപ്പെണ്ണേ.. എന്ന ഗാനവും അതിലെ നായികയും ഇന്നും പ്രേക്ഷകഹൃദയങ്ങളിൽ തങ്ങി നിൽക്കുന്നു.. അവിസ്മരണീയ ദൃശ്യങ്ങളുടെ നായിക അഖിലയുടെ വിശേഷങ്ങളിലേക്ക്..

- അപ്പൂസ് കെ.എസ്

ഈയിടെ സോഷ്യൽ മീഡിയയയിൽ ശ്രദ്ധിക്കപ്പെട്ടതിനുശേഷം മലയാളി പ്രേക്ഷകർ എല്ലാ വരും അഖിലയോട് ഒരേപോലെ ചോദിക്കുന്ന ചോദ്യമാണ്, എവിടെയായിരുന്നു ഇത്രകാലം എന്നുള്ളത്. എന്താണ് അതിനുള്ള ഉത്തരം?

കലാപരമായ കാര്യങ്ങളിൽ ഒക്കെ ഏർപ്പെട്ടു കൊണ്ട് ഞാൻ ഇവിടെയൊക്കെ തന്നെയുണ്ടായിരുന്നു എന്നതാണ് പറയാനുള്ളത്. സോഷ്യൽ മീഡിയയിൽ സജീവമല്ലെങ്കിൽ ആളുകൾ ജീവനോടെയില്ല എന്നുള്ളതാണല്ലോ ഇപ്പോഴത്തെ വിലയിരുത്തൽ.

അങ്ങനെ വരുമ്പോഴാണ് ഞാൻ ഇവിടെയൊന്നും ഇല്ല എന്ന തോന്നലുണ്ടാകുന്നത്. ഇപ്പോൾ എനിക്ക് സോഷ്യൽ മീഡിയയിൽ അക്കൗണ്ട് ഒക്കെയുണ്ട്. എന്റെ ഇഷ്ടം അനുസരിച്ച് ഞാൻ പോസ്റ്റ് ചെയ്യാറുമുണ്ട്.

കാര്യസ്ഥൻ, തേജാഭായി ആൻഡ് ഫാമിലി എന്നീ രണ്ട് സൂപ്പർഹിറ്റ് സിനിമകൾ മാത്രം ചെയ്തിട്ടാണ് അഖില പെട്ടെന്ന് അപ്രത്യക്ഷമാകുന്നത്. പിന്നീട് എവിടെയും മുഖം കണ്ടുപോലുമില്ല. അതുകൊണ്ടുകൂടിയാണ് ഈ ചോദ്യം ആവർത്തിക്കപ്പെടുന്നതെന്ന് തോന്നുന്നു?

സിനിമ ചെയ്യാതിരുന്നതിന് എന്റേതായ കാരണങ്ങളുണ്ട്. ഒരു വ്യക്തിയുടെ ജീവിതത്തിൽ ഒരു സിനിമ സംഭവിക്കുന്നത് ഒരുപാട് കാര്യങ്ങൾ ഒത്തുവന്നിട്ടാണ്. അഴിൽ ഏതെങ്കിലും ഒന്ന് ശരിയായില്ലെങ്കിൽ പോലും അതിനെ ബാധിക്കും. സിനിമയ്ക്കുശേഷം ഞാൻ കുറച്ച് ഷോകൾ ഒക്കെ ചെയ്തിരുന്നു. പക്ഷേ ആളുകൾ സിനിമയിൽ എന്നെ കണ്ടിട്ടില്ല എന്നതുകൊണ്ടാണ് നായിക എവിടെ എന്നുള്ള ചോദ്യങ്ങൾ ഒക്കെ ഉയർത്താൻ കാരണം. പിന്നീട് ഞാൻ അഞ്ചുവർഷത്തോളം മുംബൈയിലായിരുന്നു. അവിടെ നിന്ന് ഞാൻ കഥക് അഭ്യസിച്ചു.

കുട്ടിക്കാലം മുതലേയുള്ള എന്റെ ഒരു ആഗ്രഹമായിരുന്നു അത്. അഭ്യസിച്ചു കഴിഞ്ഞപ്പോൾ ഗുരുവിന്റെ നിർദ്ദേശപ്രകാരം സ്റ്റേജുകളിൽ അവതരിപ്പിക്കാൻ തുടങ്ങി.