പ്രിയംവദയുടെ സ്വപ്നങ്ങൾ

കൊൽക്കത്തയിലെയും കേരളത്തിലെയും രണ്ടു തരത്തിലുള്ള സംസ്കാരങ്ങളും ആചാരങ്ങളുമൊക്കെ എന്നെ രൂപപ്പെടുത്താൻ സഹായിച്ചിട്ടുണ്ട്

- നിഷിമ

"തൊട്ടപ്പൻ' എന്ന സിനിമയിലെ ശ്രദ്ധേയമായ പ്രകടനത്തിലൂടെ അഭിനയരംഗത്ത് തുടക്കം കുറിച്ച നടിയാണ് പ്രിയംവദ കൃഷ്ണൻ. ചിത്രത്തിലെ 'സാറക്കൊച്ച്' എന്ന കഥാപാത്രം സംസ്ഥാന സർക്കാരിന്റെ സ്പെഷൽ ജൂറി പുരസ്കാരമടക്കം ഒട്ടേറെ അവാർഡുകൾ പ്രിയംവദയ്ക്കു നേടിക്കൊടുത്തു. തൊട്ടപ്പനിലെ വേഷം കണ്ടാണ് ജി.ആർ. ഇന്ദുഗോപൻ രചനയും ജയൻ നമ്പ്യാർ സംവിധാനവും നിർവഹിച്ച 'വിലായത്ബുദ്ധ'യിലെ 'ചൈതന്യം എന്ന കഥാപാത്രം പ്രിയംവദയെ തേടിയെത്തിയത്. നരിവേട്ട'യിലെ മിന്നൽ വള കയ്യിലിട്ട പെണ്ണഴകേ 'എന്ന ഒറ്റപ്പാട്ടിലൂടെ സമൂഹമാധ്യമങ്ങളിൽ വൈറൽ താരവുമായി പ്രിയംവദ. കലാചരിത്ര ഗവേഷകനും എഴുത്തുകാരനുമായ കെ.കെ. ഗോപാലകൃഷ്ണന്റെയും പ്രശസ്ത നർത്തകി പല്ലവി കൃഷ്ണന്റെയും മകളായ പ്രിയംവദ തന്റെ സിനിമാസ്വപ്നങ്ങളെക്കുറിച്ച് മനസ്സു തുറക്കുന്നു.

സ്വപ്നങ്ങളുടെ തുടക്കം

സ്കൂളിൽ പഠിക്കുന്ന കാലം മുതൽ അഭിനയരംഗത്ത് എത്തണമെന്നായിരുന്നു എന്റെ ആഗ്രഹം. പക്ഷേ, അത് അധികം ആരോടും പറഞ്ഞിരുന്നില്ല. തൃശൂർ ദേവമാതാ പബ്ലിക് സ്കൂളിൽ ആറാം ക്ലാസിൽ പഠിക്കുമ്പോഴാണ് എന്റെ ഏറ്റവും അടുത്ത സുഹൃത്തായ നീതുവിനോട് വലുതാകുമ്പോൾ നടിയാകണമെന്ന ആഗ്രഹം ഞാൻ ആദ്യമായി വെളിപ്പെടുത്തിയത് അവൾക്ക് ഡോക്ടറാകാനായിരുന്നു മോഹം. ഒടുവിൽ ഞാൻ നടിയും അവൾ ഡോക്ടറുമായി. പ്ലസ് ടുവിന് പഠിക്കുമ്പോൾ "മിസ് മലബാർ' മത്സരത്തിൽ സെക്കൻഡ് റണ്ണർ അപ്പ് ആയിരുന്നെങ്കിലും മോഡലിങ് അല്ല എന്റെ പാഷനെന്ന് എനിക്ക് കൃത്യമായി അറിയാമായിരുന്നു.

സെമസ്റ്റർ ബ്രേക്കിൽ എത്തിയ തൊട്ടപ്പൻ