വളർത്തുമൃഗങ്ങളിൽ പേവിഷബാധ

പെറ്റ്സ് കോർണർ

- ഡോ. ബീന. ഡി

രോഗബാധ ഉണ്ടായാൽ മരണം സുനിശ്ചിതമായ ഒരു ജന്തുജന്യ രോഗമാണ് പേവിഷബാധ, രോഗബാധയുള്ള നായയുടെ കടിയിലൂടെയാണ് പ്രധാനമായും രോഗം പകരുക. തലച്ചോറിനെ ബാധിക്കുന്ന ഒരു വൈറസ് രോഗമാണ് പേവിഷബാധ. 90% പേവിഷബാധയും ഉണ്ടാകുന്നത് നായ്ക്കൾ മുഖേനയാണ്. വളർത്തുമൃഗങ്ങളായ പൂച്ച, പശു, ആട് എന്നിവയിലൂടെയും വവ്വാലുകൾ എന്നിവയിൽ നിന്നും രോഗപ്പകർച്ച ഉണ്ടാവാം. കടിക്കുകയോ മാന്തുകയോ വഴി ഉണ്ടാകുന്ന മുറിവിലൂടെ രോഗാണുക്കളായ വൈറസുകൾ നാഡികൾ വഴി സുഷുമ്നയിലേക്കും തലച്ചോറിലേക്കും എത്തുമ്പോഴാണ് രോഗലക്ഷണങ്ങൾ പ്രകടമാകുന്നത്. രോഗലക്ഷണങ്ങൾ കണ്ടുതുടങ്ങിയാൽ പിന്നെ ചികിത്സ ദുർഘടമാണ്. നായ്ക്കളിൽ ഈ രോഗം രണ്ടു രൂപത്തിൽ കാണപ്പെടാറുണ്ട്. രൗദ്രരൂപവും മൂകരൂപവും.