நடிகர் சைஃப் அலிகானும்

ரூ.15 ஆயிரம் கேகாடி சொத்தும்..!

- பேராச்சி கண்ணன்

பாலிவுட் நடிகர் அலி கானுக்கு இந்தாண்டு போதாத காலம். ஜனவரி 16ம் தேதி அவர் வீட்டில் வைத்து ஒரு நபரால் கொடூரமாகக் கத்தியால் குத்தப்பட்டார். பிறகு அபாயக் கட்டத்தைக் கடந்து ஒருவழியாக அதிலிருந்து மீண்டு வந்தார்.

இதன்பிறகு அடுத்த சில நாட்களிலேயே போபாலில் உள்ள தனது குடும்பத்தின் 15,000 கோடி ரூபாய் சொத்துக்களை இழக்கும் அபாயத்தைச் சந்தித்தார்.

அந்த வழக்கு இப்போது விஸ்வரூபம் எடுத்துள்ளது. சமீபத்தில் இந்தச் சொத்து தொடர்பான வழக்கை மறுவிசாரணைக்கு உத்தரவிட்டுள்ளது மத்திய பிரதேச உயர் நீதிமன்றம்.

இதனால் போபால் நவாப் குடும்பத்தின் சொத்துக்கள் சைஃப் அலிகான் வசம் வருமா அல்லது அரசாங்கம் கையகப்படுத்துமா எனச் செய்திகள் பரபரக்கின்றன.

பொதுவாக சைஃப் அலிகான் பாலிவுட் நடிகராகத்தான் பலருக்கும் பரிச்சயம். அவர் 'நவாப் ஆஃப் பட்டோடி' மற்றும் 'நவாப் ஆஃப் போபால்' என இரண்டு அரச குடும்பங்களைச் சேர்ந்தவர் என்பது பலர் அறியாதது. இந்தப் பின்னணியிலிருந்து பார்த்தாலே இந்த சொத்து வழக்கின் பின்புலம் புரிபடும்.

சுதந்திர இந்தியாவிற்கு முன் போபாலின் கடைசி நவாப்பாக இருந்தவர் ஹமீதுல்லா கான். இவரின் மூத்த மகள் அபிதா சுல்தான். இரண்டாவது மகள் சஜிதா சுல்தான். மூன்றாவது மகள் ரபியா சுல்தான்.

இதில் மூத்த மகள் அபிதா, பாரம்பரிய முறைப்படி நவாப் பின் சொத்துக்கு வாரிசானார். ஆனால், அவர் 1950ம் ஆண்டு பாகிஸ்தானுக்குக் குடிபெயர்ந்துவிட்டார். இந்நிலையில் இரண்டாவது மகளான சஜிதா சுல்தான், நவாப் ஆஃப் பட்டோடியாக இருந்த முன்னாள் கிரிக்கெட் வீரர் இஃப்திகார் அலி கான் பட்டோடியை திருமணம் செய்துகொண்டு இந்தியாவில் செட்டிலாகி இருந்தார்.

இதனால், அபிதாவின் அடுத்த சகோதரி சஜிதா சுல்தான், நவாப்பின் சொத்துக்குச் சட்டபூர்வ உரிமையாளரானார்.

1962ம் ஆண்டு அப்போதைய நேரு தலைமையிலான அரசு, 'சஜிதாவின் கோரிக்கையை ஏற்று ஹமீதுல்லா கானின் அனைத்து தனியார் அசையும் மற்றும் அசையா சொத்துக்களுக்கும் ஒரே வாரிசு சஜிதாதான். சொத்துக்கள் அவருக்கு மாற்றப்படுவதில் எந்த ஆட்சேபணையும் இல்லை' எனக் கூறியது. இதனால் போபால் நவாப் பேகம் என அழைக்கப்பட்டார்.