ஜோதிடமும் சுற்றுலாவுக்கு ஆபத்தான நாடுகளும்!

கடந்த 1999ம் வருடம் ரியோ டட்சுகி எழுதிய ‘த ஃப்யூச்சர் ஐசா' வெளியானது.

- 

ஜப்பானின் புகழ்பெற்ற 'மங்கா' காமிக்ஸ் புத்தகம் இது.

இந்தப் புத்தகத்தில் 2011ம் வருடம் நடக்கப்போகிற பூகம்பம் மற்றும் சுனாமியைப் பற்றிய பதிவுகள் இருந்தன. புத்தகத்தில் சொன்ன மாதிரியே ஜப்பானில் 2011ம் வருடம் பூகம்பமும், சுனாமியும் வந்து ஆயிரக்கணக்கானோர் இறந்துவிட்டனர்.

எதிர்காலத்துக்கு ஏற்ப சில திருத்தங்கள் செய்யப்பட்டு, 2021ல் மறுபதிப்பு வெளியானது. இதில் 2025ம் வருடம் ஜூலை 5ம் தேதியன்று ஜப்பானில் பெரிய அளவில் பூகம்பம் வரப்போகிறது என்று குறிப்பிடப் பட்டிருந்தது.

முன்னெச்சரிக்கை செயல்களாக ஜப்பானில் பல நடவடிக்கைகள் மேற்கொள்ளப்பட்டன. பல நாடுகளிலிருந்து தினமும் ஜப்பானுக்குச் செல்லும் விமானங்கள் கூட சரியாக இயங்கவில்லை.

குறிப்பாக ஜப்பானுக்குச் செல்வதற்காக காத்திருந்த ஆயிரக்கணக்கான வெளிநாட்டுப் பயணிகள் தங்களின் திட்டங்களைக் கைவிட்டனர்.

ஆயிரக்கணக்கானோர் தங்கள் விமான டிக்கெட்டை ரத்து செய்தனர். ஜப்பானிய சுற்றுலாத் துறைக்குப் பெருத்த நஷ்டம்.

ஆனால், அந்தப் புத்தகத்தில் சொன்னபடி ஜூலை 5ம் தேதி எதுவும் நடக்கவில்லை. இருந்தாலும் ஒருவித பதற்றம் அங்கே இருந்துகொண்டேதான் இருக்கிறது.

முக்கியமாக ஒவ்வொரு மாதமும் ஜப்பானுக்கு வருகை தரும் வெளிநாட்டுச் சுற்றுலாப் பயணிகளின் எண்ணிக்கை வீழ்ச்சியடைந்துள்ளது.

இந்நிலையில், சுற்றுலாவாசிகளுக்கு ஆபத்தான நாடுகளைப் பற்றிப் பார்ப்போம்.

ஆப்கானிஸ்தான்

அமெரிக்கா உட்பட பல பணக்கார நாடுகள் ஆப்கானிஸ்தானுக்குச் சுற்றுலா செல்ல வேண்டாம் என்று தங்கள் நாட்டு மக்களிடம் எச்சரிக்கை செய்துள்ளது. தீவிரவாதம், ஆள் கடத்தல், பாதுகாப்பின்மைதான் இந்தத் தடைக்கு முக்கிய காரணம்.

தவிர, ஆப்கானிஸ்தானில் கிராமப்புறங்களில் மருத்துவ சேவை கிடைப்பது மிகவும் கடினம் என்றும் முன்னெச்சரிக்கை செய்கின்றனர்.