பரவை கிராமம் சீரியல் to சினிமா!

தமிழ்ச் சினிமாவில் நகைச்சுவையிலும் குணச்சித்திரத்திலும் செமயாய் கலக்கி வருபவர் நடிகர் பால சரவணன்.

- ஆர். சந்திரசேகர்

குறிப்பாக டைமிங் காமெடியில் அப்ளாஸ் அள்ளுபவர்.

கடந்த ஆண்டு வெளிவந்த 'லப்பர் பந்து' அவருக்கு நிறைய பாராட்டுகளைப் பெற்றுத் தந்தது என்றால் இந்த ஆண்டு, 'பெருசு', 'மாமன்’, ‘ஜின் த பெட்’ உள்ளிட்ட படங்கள் நல்ல கவனம் ஈர்த்துள்ளன.

இப்போது இயக்குநர்கள் வாழ்த்தும் நடிகராக, அவர்களின் குட்புக்கில் ஒருவராகத் திகழ்கிறார் பால சரவணன். சுமார் 12 ஆண்டுகளாக திரைத்துறையில் தனக்கென தனிமுத்திரையுடன் பிரகாசிக்கும் அவரை பரபரக்கும் ஒரு ஷூட்டிங் கேப்பில் பிடித்தோம்.

'சொல்லுங்க பாஸ்' என அவருக்கே உண்டான கலாய்த்தலுடன் ஆஜரானவர், கலகலவென சிரித்தபடி ஆரம்பித்தார்.

"சினிமாவுக்குள் 12 ஆண்டுகள் போனதே தெரியல. 2013ல் 'குட்டிப்புலி'யில் ஆரம்பிச்சது. இப்பவரை கிட்டத்தட்ட அறுபதுக்கும் மேற்பட்ட படங்கள்ல நடிச்சிட்டேன். ரொம்ப சந்தோஷமா இருக்கு.

நான் சினிமாவுக்கு வந்தப்ப நல்ல படங்களில் நல்ல கேரக்டர்களாக பார்த்து நடிக்கணும்னு ஆசைப்பட்டு வந்தேன். தொடர்ந்து இயங்கிட்டே இருந்தால் போதும்னு நினைச்சேன். ஆனா, நான் நினைச்சு வந்ததை விட பலமடங்கு சினிமா எனக்குக் கொடுத்திட்டு இருக்குனு தான் சொல்லணும்.

மிகப்பெரிய கதாபாத்திரங்களும், தனித்துவமாகத் தெரிகிற கதாபாத்திரங்களும் எனக்கு அமைஞ்சது, அமைஞ்சிட்டும் இருக்குது.

இப்ப நான் இருக்கிற இடம் நானே நினைச்சுப் பார்க்காதது. ரொம்ப மகிழ்ச்சியாக இருக்கேன். இதை கடைசி வரை தக்க வச்சால் போதும்..." என்கிறவர், தன் சினிமா பயணத்தை சட்டென ரீவைண்ட் செய்தார்.