ஒரு காட்சி என்றாலும் அஜித் சார் படம் என்றால் டிரியுள் ஓகே!

'வெண் மேகம் பெண் ஆனதோ...' என்ற கவிஞரின் வரிக்கு வலிமை சேர்க்கும் அழகுக்கு சொந்தக்காரர் மீனாட்சி கோவிந்தராஜன்.

- எஸ்.ராஜா

'கென்னடி கிளப்', 'கோப்ரா' போன்ற படங்களில் கவனிக்க வைத்தவர். இப்போது சுசீந்திரன் இயக்கியுள்ள '2 கே லவ் ஸ்டோரி' படத்தில் நடித்துள்ளார்.

மீண்டும் சுசீந்திரன் இயக்கத்தில் நடிச்ச அனுபவம் எப்படியிருந்துச்சு?

சுசீந்திரன் சாருடன் எனக்கு மூணாவது படம் இது. பெரிய அளவுல தத்துவம் சொல்லாம, மனசை லேசா வெச்சுக்கக்கூடிய அழகான படம்னு படம் பார்த்தவங்க கமெண்ட் பண்ணினாங்க. நானும் ஒரு 2 கே கிட் என்பதால கதையை ஈசியா கனெக்ட் பண்ணிக்க முடிஞ்சது.

சுசீந்திரன் சாருடன் வேலை செய்வது எப்போதும் ஈசியான விஷயம். கதைக்கு என்ன வேணுமோ அதை ஒவ்வொரு காட்சியாவே நடிச்சுக்காட்டுவார். புது நடிகர், நடிகை கூட அவரோடு ரொம்ப ஈசியா வேலை பார்க்க முடியும்.

இந்தப் படத்துக்காக எந்த ஹோம் ஒர்க்கும் பண்ணவில்லை. எல்லாம் செட்ல டைரக்டர் சொன்னது மட்டுமே. கறார் பொண்ணா நடிச்சதற்கு நிறைய பாராட்டு கிடைச்சது.

ஒவ்வொரு படத்திலும் ஏதாவது கத்துக்கற மாதிரி ஒரு விஷயம் இருக்கும். இதுவரை கேர்ள் நெக்ஸ்ட் டோர் கேரக்டர்தான் பண்ணியிருக்கிறேன். இதுல, இது வரை பண்ணாத ரோல் என்பதால் புது விஷயங்களை கத்துக்க முடிஞ்சது. அதற்கு இயக்குநர் சுசீந்திரன் சார் உதவியா இருந்தார்.

புதுமுக ஹீரோவுடன் வேலை செஞ்சது கஷ்டமா இருந்துச்சா?

ஹீரோ ஜெகவீருக்கு இது தான் முதல் படம். ஆரம்பத்துல கொஞ்சம் கஷ்டமா இருந்துச்சு. நான் ஏற்கனவே சொன்ன மாதிரி, புதுமுகமா இருந்தாலும் தெரிஞ்ச முகமா இருந்தாலும், சுசீ சார் நடிக்க வெச்சுடுவார். அதுதான் நான் சினிமாவுக்கு வந்தபோதும் நடந்துச்சு.

என்னுடைய சினிமா பயணம் சுசீ சார் பண்ணிய 'கென்னடி கிளப்' படத்துலதான் ஆரம்பமாச்சு. அந்த சமயத்துல சினிமாவைப் பற்றி எனக்கு சுத்தமா எதுவும் தெரியாது.