இந்தியாவில் அதிகரிக்கும் முதியவர்கள்...குறைந்து வரும் குழந்தைகள்..!

இந்தியாவில் குழந்தைப் பிறப்பு விகிதம் குறைந்து வருகிறது; 'முதியவர்களின் எண்ணிக்கை அதிகரித்துக்கொண்டே செல்கிறது...' என்பதுதான் சமீபத்திய ஹாட் டாக்.

- த.சக்திவேல்

கடந்த 2023ம் வருடத்தின் கணக்கெடுப்பின்படி, உலகம் முழுவதும் 60 வயது அல்லது 60 வயதுக்கும் அதிகமானோரின் எண்ணிக்கை, 110 கோடியைத் தாண்டிவிட்டது.

அதாவது, 2023ன் கணக்கெடுப்பின்படி உலக மக்கள் தொகையில் 14.16 சதவீதத்தினர் முதியவர்கள். 2050ம் வருடம் முதியவர்களின் எண்ணிக்கை, 221 கோடியாக உயரும். அதாவது, 2050ல் உலகில் வாழும் மொத்த மக்களில் 22 சதவீதம் பேர் முதியவர்களாக இருப்பார்கள்.

மட்டுமல்ல, முதியவர்களைக் கவனித்துக்கொள்வதும், அவர்களின் நல்வாழ்வும் இந்தியாவின் முன்னுரிமையாக மாறப்போகிறது.

ஆம்; மற்ற நாடுகளைப்போல இந்தியாவிலும் முதியவர்களின் எண்ணிக்கை அதிகரித்துக்கொண்டே செல்கிறது.

அதே நேரத்தில் குழந்தைப் பிறப்பு விகிதம் குறைந்து வருகிறது.

இப்போது இந்தியாவில் 60 வயது மற்றும் 60 வயதுக்கும் மேலானவர்களின் எண்ணிக்கை, 14.9 கோடி. அதாவது, இந்தியாவின் மொத்த மக்கள் தொகையில் முதியவர்களின் எண்ணிக்கை, 10.5 சதவீதம்.

2050ல் இந்தியாவில் முதியவர்களின் எண்ணிக்கை இரட்டிப்பாகி, 35 கோடியாக இருக்கும். அதாவது, மொத்த மக்கள் தொகையில் முதியவர்களின் எண்ணிக்கை 20.8 சதவீதமாக இருக்கும். ஃபிரான்ஸில் முதியவர்களின் எண்ணிக்கை இரட்டிப்பாக 120 ஆண்டுகளானது; ஸ்வீடனில் 80 ஆண்டுகளானது.

ஆனால், இந்தியாவில் 26 வருடங்களில் முதியவர்களின் எண்ணிக்கை இரட்டிப்பாகப் போகிறது என்பதுதான் இதில் ஹைலைட்.