மிஸ் இந்தியா வணங்கான்!

தமிழ் சினிமாவின் ஆளுமை இயக்குநர் பாலா. இவர் பேசியதைவிட இவர் படங்கள்தான் அதிகம் பேசும். இவருடைய ‘சேது', 'பிதா மகன்', 'நான் கடவுள்' என ஒவ்வொரு படமும் சமூக அவலங்களையும், விளிம்பு நிலை மக்களின் வாழ்க்கையையும் மிக யதார்த்தமாகப் படம் பிடித்துக் காட்டியவை.

- எஸ்.ராஜா

தன்னுடைய 25ம் ஆண்டு சினிமா வாழ்க்கையில் இவர் இயக்கி வெளியாகியுள்ள படம் ‘வணங்கான்’.

மாற்றுத்திறனாளிகளின் மனவலியை தனக்கே உரிய ஸ்டைலில் வலிமையாகச் சொல்லி வழக்கம்போல் ரசிகர்களை தன் வசப்படுத்தியுள்ளார்.இதில் யாரும் எதிர்பார்க்காத வகையில் அட்டகாசமான நடிப்பை வழங்கி ரசிகர்களின் கவனத்தை ஈர்த்தவர் ரோஷிணி பிரகாஷ். ‘மிஸ் இந்தியா’ போட்டியில் பங்கேற்ற இந்த கன்னடத்து பைங்கிளி தமிழில் சில படங்கள் செய்திருந்தாலும் ‘வணங்கான்’ படத்தில் அழுத்தமாக தன் முத்திரையைப் பதித்து அனைவரின் கவனத்தையும் ஈர்த்துள்ளார்.

அழகிப் போட்டிகள்தான் உங்களை நடிகையாக மாற்றியதா?

சின்ன வயசுலேயே பரதநாட்டியம் கத்துக்கிட்டேன். பள்ளி நாட்களில் எல்லா போட்டிகளிலும் என்னுடைய பேர் முதலில் இருக்கும். என்ஜினியரிங் படிக்கும்போது ‘சினிமாதான் உன் லட்சியம், அதைவிட்டுட்டு காலேஜ்ல உட்கார்ந்துட்டு இருந்தால் நியாயமா’ன்னு என் மனசு கேட்டுச்சு.அந்த சமயத்துலதான் ‘மிஸ் இந்தியா’, சினிமா சான்ஸ் என டபுள் சான்ஸ் கிடைச்சது.

‘வணங்கான்’ வாய்ப்பு எதிர்பார்த்தீர்களா?

என்னுடைய போட்டோவைப் பார்த்துவிட்டு பாலா சார் ஆபீஸிலிருந்து போன் பண்ணினாங்க. அந்த போன் அழைப்பை என்னால் நம்ப முடியவில்லை. அடுத்த நாளே ஆடிஷனுக்காக சென்னைக்கு வந்தேன். இயக்குநர் ஏ.எல்.விஜய் ரெண்டு சீன் கொடுத்து நடிக்கச் சொன்னார். அதைப் பார்த்துவிட்டு பாலா சார் ஓகே சொல்லிட்டார்.

படப்பிடிப்புல நடந்த சுவாரஸ்யமான அனுபவம்..?

எனக்கு வித்தியாசமான ரோல் என்பது படம் பார்த்தவர்களுக்குத் தெரியும். என்னுடைய கேரக்டரை எப்படி பண்ணலாம் என்ற சிந்தனைதான் இருந்துச்சு. அதுமட்டுமல்ல, சைகை மொழியைத் தெரிஞ்ச கேரக்டர் என்பதால் அதற்குரிய பயிற்சியையும் எடுக்க வேண்டும்.பாலா சாரின் படங்கள் எனக்குப் பிடிக்கும். அவருடைய டைரக்‌ஷனில் நடிக்கும் சான்ஸ் என்பதோடு அவருடைய ஃபிலிம் மேக்கிங்கை நேரில் பார்க்கும் வாய்ப்பு கிடைச்சது.