இந்த பள்ளியில் படிக்க வருடத்துக்கு 1.15 ஃபீஸ்!

பொதுவாக ஒரு நல்ல பள்ளியில் தங்களது குழந்தைகள் படிக்க வேண்டும் என்று ஒவ்வொரு பெற்றோரும் விரும்புவார்கள். அவர்கள் ஏழையாக இருந்தாலும் சரி, பெரும் கோடீஸ்வரர்களாக இருந்தாலும் சரி இந்த விருப்பம் மாறாது.

- த.சக்திவேல்

நம் சமூகத்தில் கடன் வாங்கி, இடத்தை விற்று தங்களின் குழந்தைகளை நல்ல பள்ளியில் சேர்க்கும் பெற்றோர்களைப் பார்த்திருப்போம்.

அதே நேரத்தில் எல்லோராலும் புகழப்படுகின்ற சிறந்த பள்ளிகளில் குழந்தைகளைச் சேர்ப்பது என்பது கடினம். காரணம், அந்தப் பள்ளியில் குழந்தைகளைச் சேர்ப்பதற்கான போட்டி கடுமையாக இருக்கும். 40 இடங்களுக்கு 4000 குழந்தைகள் போட்டி போடுவார்கள்.

இது மாதிரி தங்களது குழந்தைகளைக் குறிப்பிட்ட ஒரு சிறந்த பள்ளியில் சேர்ப்பதற்காக பெருங் கோடீஸ்வரர்களின் மத்தியில் போட்டியே நடக்கிறது. அந்தப் பள்ளியின் பெயர், ‘லே ரோஸி’. உலகிலேயே அதிக கட்டணம் வசூலிக்கும் பள்ளி இதுதான்.

ஆம்; இப்பள்ளியில் படிப்பதற்கான வருடாந்திரக் கட்டணம், சுமார் 1.15 கோடி ரூபாய். உலகின் முதன்மையான கோடீஸ்வர்கள், மன்னர்கள், அரசியல்வாதிகள் உட்பட செல்வாக்கான பல குடும்பங்களின் வாரிசுகள் இங்கேதான் படிக்கின்றனர். இந்தப் பள்ளியில் இடம் கிடைக்காத போதுதான் பெரும் கோடீஸ்வரர்கள் வேறு பள்ளியைத் தேடிச் செல்கின்றனர்.

அப்படி இந்தப் பள்ளியில் என்ன ஸ்பெஷல்?

சுவிட்சர்லாந்தின் இயற்கை அழகைப் பிரதிபலிக்கும் ரோல் எனும் இடத்தில் கம்பீரமாக அமைந்துள்ளது, ‘லே ரோஸி’. ஐரோப்பாவின் பழமையான தனியார் உறைவிடப் பள்ளிகளில் இதுவும் ஒன்று. ஆம்; 1880ம் வருடத்திலிருந்து இயங்கி வருகிறது இந்த தனியார் உறைவிடப் பள்ளி. ஆண், பெண் என இரு பாலினரும் சேர்ந்து படிக்கின்ற பள்ளி இது.