AI கொலை..?

இரு மாதங்கள் கழித்து ஒரு மரணம் சர்வதேச அளவில் பெரும் அதிர்வலையை ஏற்படுத்த முடியுமா? முடியும். மரணித்தவர் AI தொடர்பான ரகசியங்களை பாதுகாத்தவர் என்றால். அந்த நபர், இளைஞர். பெயர் சுசிர் பாலாஜி.

- 

இந்திய வம்சாவளியைச் சேர்ந்த இவர், 1998ல் பிறந்தவர். அமெரிக்காவில் வளர்ந்தவர். சிறுவயது முதலே கம்ப்யூட்டர் ப்ரோகிராமிங்கில் கில்லாடி. அதனாலேயே கலிஃபோர்னியா பல்கலைக்கழகத்தில் படித்தபோது பல்வேறு ப்ரோகிராமிங் போட்டிகளில் ஆர்வத்துடன் கலந்துகொண்டு பரிசுகளைப் பெற்றார்.

படிப்பு முடிந்ததும் வேலை கிடைத்தது. ஸ்கேல் ஏஐ. ஹெலியா, குவோரா போன்ற நிறுவனங்களில் பணியாற்றிய பிறகு ஓப்பன் ஏஐ நிறுவனத்தில் இணைந்தார் சுசிர்.

இந்த ஓப்பன் ஏஐ நிறுவனத்தின் பிரபலமான உருவாக்கம்தான் சாட்ஜிபிடி செயலி. முழுக்க முழுக்க சாட்ஜிபிடி, சுசிர் பாலாஜியின் குழந்தை; மூளை; சொத்து.

ஆம். கல்லூரிக் காலத்தில் அவர் உருவாக்கிய Scale AI என்னும் இயங்குதளமே ChatGPT உருவாக அடிப்படைக் காரணம்.

இச்சூழலில், கருத்து வேறுபாடுகள்... நிறுவனத்தின் மீதான முரண்பாடுகள் காரணமாக கடந்த அக்டோபர் மாதம் ஓப்பன் ஏஐ நிறுவனத்தை விட்டு சுசிர் வெளியேறினார்.

அத்துடன் ஓப்பன் ஏஐ குறித்து ‘நியூயார்க் டைம்ஸ்’ பத்திரிகையில் பேட்டி கொடுத்தார். அந்த நேர்காணல் சர்ச்சையைக் கிளப்பியது.

இந்நிலையில் கடந்த நவம்பர் 26ம் தேதி சான் பிரான்சிஸ்கோவில் உள்ள தனது அப்பார்ட்மென்டில் உயிரிழந்த நிலையில் சுசிர் பாலாஜி கண்டெடுக்கப்பட்டார்.

சுசிர் பாலாஜி தற்கொலை செய்து கொண்டார் என அமெரிக்க போலீஸ் விசாரணையை முடித்தது.

ஆனால், ‘‘என் மகன் தற்கொலை செய்து கொள்ளவில்லை... ஏனெனில் அவர் தைரியசாலி. மன பலத்தில் அவரை மிஞ்ச ஆளில்லை. தவிர இறப்பதற்கு முன் தன் பிறந்தநாளை நண்பர்களுடன் மகிழ்ச்சியாகக் கொண்டாடியிருக்கிறார். அப்படிப்பட்டவர் எப்படி தற்கொலை செய்து கொள்வார்..?’’ என பகிரங்கமாக அவரது தாயார் பூர்ணிமா ராவ் குற்றம்சாட்டியுள்ளார்.