திரில்லர் + அமானுஷ்யம் = ககன மார்கன்

‘‘‘கவனக் குளிகை கொண்டு அதனாலே ககனமார்க்கந் தனிலே அகனமாய்ச்சென்று தவமுறு மா சித்தர்கள் வாழ்கின்ற சதுரகிரிக்குப் போய் குதூகலித்தேன்’ - ‘மாயா மச்சிந்திரா’ என்று செல்லமாக அழைக்கப்படும்  மச்சேந்திர சித்தர் எழுதிய பாடல் இது. அந்தப் பாடலில் இருந்துதான் இந்த ‘ககன மார்கன் ’ங்கிற பெயர்...’’ எனத் தொடங்கினார் இயக்குநர் மற்றும் எடிட்டர் லியோ ஜான் பால்.   

- ஷாலினி நியூட்டன்

‘அட்டகத்தி’, ‘பீட்சா’, ‘சூது கவ்வும்’, ‘இதற்குத்தானே ஆசைப்பட்டாய் பாலகுமாரா’, ‘தெகிடி’ , ‘முண்டாசுப்பட்டி’ உள்ளிட்ட தமிழ் சினிமாவின் டிரெண்ட் செட்டிங் படங்கள் அனைத்திலும் சிறந்த படத்தொகுப்பை கொடுத்தவர் தான் லியோ ஜான் பால்.  தற்போது விஜய் ஆண்டனி நடிப்பில் ‘ககன மார்கன்’ படம் மூலமாக இயக்குனராக அறிமுகமாகவிருக்கிறார்.
ககன மார்கன்...

ககன என்றால் ஆகாயம் மற்றும் காற்று என்கிற பொருள் வரும். மார்க்கம் என்றால் பாதை, வழி. இதில் மார்க்கம் என்கிறதைத்தான் மார்கன் என மாற்றி ‘ககன மார்கன்’ என்கிற தலைப்பு இந்தப்  படத்துக்கு வந்தது. 

தொடர்ந்து மர்மமாக மேலும் அமானுஷ்யமாக நடக்கும் கொலைகள், அதை கண்டுபிடிக்க மும்பையில் இருந்து வரும் சிறப்பு போலீஸ் அதிகாரிதான் படத்தின் நாயகன். அதைத் தொடர்ந்து நடக்கும் விசாரணை, குற்றவாளி யார் என்கிற கேள்விக்கு பதில் எல்லாம் சேர்ந்துதான் படத்தின் கதை. விஜய் ஆண்டனி உடன் இணைந்து பணியாற்றிய அனுபவம் குறித்து சொல்லுங்க...

எனது முதல் படம், நான் இன்று இயக்குனர்… இதற்கு காரணமே விஜய் ஆண்டனி சார் தான். இரண்டு மூன்று வருஷங்களாகவே அவரை நல்லா தெரியும். நிறைய ப்ராஜெக்ட்ல அவருக்காக வேலை செய்திருக்கேன். ஒரு சில டிரெய்லர் கட் கூட என்னிடம் கொடுத்து செய்து தரச் சொல்லி இருக்கார். அப்படி ஒரு ப்ராஜெக்ட் விஷயமா பேசும் போதுதான் இந்தக் கதையைக் குறித்து நான் விஜய் ஆண்டனி சாரிடம் சொன்னேன். கேட்டவுடன் அவரே தயாரிக்கவும் முன் வந்தார்.