200 ப்ளஸ் நாடுகளின் தேசிய கீதம் பாடும் தமிழக மாணவி

ஒன்றோ... இரண்டோ அல்ல... சுமார் இருநூறுக்கும் மேற்பட்ட நாடுகளின் தேசிய கீதங்கள்.

- 

அதுவும், அந்த நாட்டின் மக்கள் எப்படி பாடுவார்களோ அதேபோல அத்தனை தத்ரூபமாக சுருதி குறையாமல் பாடி அசத்துகிறார் பதினைந்து வயதே நிரம்பிய மாணவி சுபிக்‌ஷா ஹேமந்த்.

ஏதேனும் ஒரு நாட்டின் பெயரைச் சொன்னால் போதும், உடனே மரியாதை செலுத்தும் விதமாக எழுந்து நின்று அந்நாட்டின் தேசிய கீதத்தை வரிகள் மாறாமல் அவ்வளவு அழகாகப் பாடிக்காட்டுகிறார்.

இந்திய தேசிய கீதத்தின் வரிகளே சில நேரங்களில் மறந்துபோகும் நமக்கு, சுபிக்‌ஷா எப்படி இத்தனை நாடுகளின் தேசிய கீதங்களை ஞாபகம் வைத்துள்ளார் என்கிற கேள்வி ரொம்பவே ஆச்சரியப்பட வைக்கிறது.

‘‘இந்தத் திறமை கடவுள் தந்த ஆசீர்வாதம்...’’ என அவர் எளிமையாகச் சொன்னாலும் உண்மையில் இதற்காக அவரின் மெனக்கெடல்கள் கொஞ்ச நஞ்சமல்ல. ஒவ்வொரு தேசிய கீதத்திற்கும் நிறைய பயிற்சி  எடுத்திருக்கிறார். ஒவ்வொரு வரியையும் எழுதிப் பார்த்தும், யூடியூப்பில் திரும்பத் திரும்பக் கேட்டும் மனத்திற்குள் பதியம் போட்டிருக்கிறார்.

‘‘பாடகியாகணும் என்கிற ஆசையில்தான் இதைத் தொடங்கினேன். ஒரு பாடகியாகி எல்லா மொழிப் பாடல்களையும் பாடணும்னு ஆசை இருந்துச்சு. அதாவது கர்நாடிக்கும் பாடணும், வெஸ்டர்னும் பாடணும், ராப்பும் பாடணும்னு நினைச்சேன். எல்லா நாட்டு மொழிகளிலும் பாடணும்னும் ஆர்வம். அதுவே தேசிய கீதங்கள் பக்கம் என்னைத் திருப்பியது...’’ என உற்சாகமாகப் பேசுகிறார் சுபிக்‌ஷா.

‘‘நான் பிறந்து வளர்ந்ததெல்லாம் சென்னைதான். அப்பா ஹேமந்த், வீடுகளுக்கான இன்டீரியர் பணியில் இருக்கார். அம்மா மோகனா ஹவுஸ் வொய்ஃப். தங்கச்சி கனிஷா இப்ப ஆறாம் வகுப்பு போறா.கொரோனா லாக்டவுன்ல இருந்துதான் இதுல நான் கவனம் செலுத்த ஆரம்பிச்சேன். அதுக்கு முன்னாடி பாடகியாகணும்னு நினைச்சதுகூட இல்ல.