நடக்காத மரபணுவியல் மாநாடு

வெளியில் பெயர் சொல்லப்படாத அந்த நகரில் நடக்காத அந்த மரபணுவியல் மாநாட்டிற்கு சுபத்ரா போய்ச் சேரும்போது காரசாரமாக ஏதோ ஒரு விவாதம் நடந்து கொண்டிருந்தது.

- ஆயிஷா இரா.நடராசன்

சர்வதேச காவல் கட்டுப்பாட்டு குழுமத்தின் தொழில்நுட்பப் பிரிவின் ஐ.ஜி சுபத்ராவின் ஒரே வேலை அந்த இடத்தில் ஒட்டுக் கேட்கும் - பார்க்கும் - தானியங்கி கேமராக்கள் மூன்றை ஆங்காங்கே பொருத்திவிடுவதுதான்.

ஆனால், மேடம் சுபத்ராவின் உதவியாளனான காசிமின் திட்டங்கள் வேறு. அங்கிருந்த கூட்டத்தில் ஏற்கனவே இரண்டு அரை டவுசர் அயல் அழகிகள் காசிமின் மனதில் ஒரு ஆயிரம் லைக்குகளை பதிவிட வைத்திருந்தனர். தவிர சர்வதேச காவல் குழுமம் தேடி வந்த நபர்... அங்கிருக்கும் பட்சத்தில் அவன் காசிம் டாக்டர் லீலாவதி காங்ஷென் எனும் உலகையே ஆட்டிப்படைக்கும் யுவதி யார் என பார்க்கவும் ஆவல் கொண்டான்.
‘வந்த வேலையை மட்டும் பார்’ சுபத்ரா சமிக்ஞையில் எச்சரித்தார். மரபணு மாற்ற விஞ்ஞானிகள் உலகெங்கும் இருந்து அங்கு வந்து கூடியது ஏன்... வெளியில் அறிவிக்கப்படாத ‘நடக்காத’ மாநாடாக அது இருப்பது ஏன்... என்பதை அறிவது சர்வதேச காவல் குழுமத்தின் பெரிய தலைவலி. இப்படி ஒன்று நடப்பதை தங்களுக்கு கசியவிட்டவர்களும் இதே அரங்கில் எங்கோதான் இருக்கிறார்கள் என்று மனதில் பட்டபோது சுபத்ரா மேடம் லேசாக புன்னகைத்தார்.

ஆறு வருடங்களாக தேடப்பட்டு வரும் குற்றவாளி மரபணுவியல் விஞ்ஞானி டாக்டர் லீலாவதி காங்ஷென் இந்த ‘நடக்காத‘ மாநாட்டிற்கு கண்டிப்பாக வருவார் என்பது வெறும் அனுமானம் அல்ல. இருமுறை இதைப்போல காவல் குழுமம் அவரை கோட்டைவிட்டது. பசிபிக் பிராந்தியத்தில் லீபிங் எனும் கப்பலில் மூன்றாண்டுகளுக்கு முன் நடந்த இதுபோன்ற நடக்காத மரபணுவியல் மாநாட்டில் தனது அடுத்த மரபணு மாற்ற மனிதக் குழந்தையை டாக்டர் லீலாவதி காங்ஷென் நேரில் செயல்விளக்கம் அளித்தது ஊடகங்களில் கசிந்து உலகையே உலுக்கிவிட்டது.