பசுமை விருந்துடன் பண்ணை வீட்டில் கல்யாணம்!

“செம்புலப் பெயல் நீர் போல அன்புடை நெஞ்சம் தாம் கலந்தனவே...’’இணையத்தில் மட்டுமல்ல பல இதயங்களிலும் சங்க இலக்கியமான குறுந்தொகையின் 40வது பாடலில் இடம்பெற்றுள்ள இந்த வரிகள் திடீர் டிரெண்டாகியிருக்கின்றன. 

- ஷோலினி நியூட்டன்

அசோக் செல்வன் - கீர்த்தி பாண்டியன் தங்களது திருமணப் புகைப்படங்களுடன் இந்த வரிகளையும் இணைந்து இணையத்தில் பகிர்ந்திருந்தனர்.

தமிழ்த் திரையுலகில் இளம் நடிகர்களில் ஒருவராக நல்ல படங்களில் நடித்து கவனம் ஈர்த்து வருபவர் நடிகர் அசோக் செல்வன். ‘சூது கவ்வும்’ படத்தில் அறிமுகமாகிய அசோக் செல்வன், ‘தெகிடி’, ‘ஓ மை கடவுளே’, துவங்கி ‘போர் தொழில்’ வரை சிறப்பான படங்களில் நடித்து வருகிறார்.

தற்போது நீலம் புரொடக்‌ஷன்ஸ் தயாரிப்பில் ‘புளூ ஸ்டார்’ என்ற படத்தில் நடித்து வருகிறார். இந்தப் படத்தில் அவருடன் இணைத்து நடித்து வருகிறார் நடிகை கீர்த்தி பாண்டியன்.

இப்படத்தின் சந்திப்பால் அசோக் செல்வனுக்கும், கீர்த்தி பாண்டியனுக்கும் காதல் மலரவே இருவருக்கும் விரைவில் திருமணம் நடைபெறவுள்ளது என சென்ற மாதம் அறிவிப்புகள் வந்தன.