லாரி ஓட்டுநர் to இயற்கை விவசாயி!

ஐடி துறையில் கை நிறைய சம்பளம் வாங்கிய இளைஞர், வேலையை உதறிவிட்டு விவசாயத்தில் இறங்கினார்... பட்டதாரி இளைஞர் இயற்கை விவசாயியாக மாறினார்... போன்ற ஏராளமான கதைகளைக் கேட்டிருப்போம்.

- த.சக்திவேல்

ஆனால், விவசாயியாக மாறிய லாரி டிரைவர்களைப் பற்றிய கதைகள் ரொம்பவே அரிது. அப்படியான ஒரு கதைக்குச் சொந்தக்காரர் கிருஷ்ணா நாக் எனும் இயற்கை விவசாயி.

ஒடிசாவிலுள்ள களஹண்டியைச் சேர்ந்த விவசாயி, கிருஷ்ணா நாக். சிறு வயதிலிருந்தே இயற்கையின் மீது தீராத காதல் கொண்டவர். தொண்ணூறுகளில் லாரி ஓட்டுநர் வேலை செய்து வந்தார். மரங்கள் அடர்ந்த சாலையில் லாரியை ஓட்டிச் செல்லும்போது, லாரியிலிருந்து இறங்கி, அந்த மரங்களை வணங்குவது கிருஷ்ணாவின் வழக்கம்.

மரங்கள் இல்லாத இடங்களில் மரங்களை நட்டு வைப்பார். இதுவரை அவர் பயணித்த சாலைகளில் நூற்றுக்கும் மேலான மரங்களை நட்டு வைத்திருக்கிறார். இயற்கையின் மீதான இந்தக் காதல்தான் அவரை ஒரு விவசாயியாக மாற்றியிருக்கிறது.

விவசாயி ஆக வேண்டும் என்று ஒருமனதாக முடிவு செய்ததும், ஒடிசாவின் தோட்டக்கலைத்துறை நடத்திய விவசாயப் பயிற்சி வகுப்புகளில் கலந்து கொண்டார். அங்கே விவசாய நுணுக்கங்களை முறைப்படி கற்றுக் கொண்டார் கிருஷ்ணா.

இந்த வகுப்புகள் குறுகிய பரப்பளவு கொண்ட விளை நிலத்தை விவசாயத்துக்காக எப்படியெல்லாம் பயன்படுத்தலாம் என்பதை அவருக்குக் கற்றுக்கொடுத்தது. அத்துடன் நவீன விவசாயத்தைவிட, இயற்கை விவசாயம்தான் கிருஷ்ணாவைத் தன்வசப்படுத்தியது.

இயற்கை விவசாயம் செய்து வந்தவர்களை நேரில் சந்தித்தும், இயற்கை விவசாயத்துக்கான வகுப்புகளில் பங்கேற்றும் இயற்கை விவசாயத்தைக் குறித்து மேலும் கற்றுக்கொண்டார்.

இதற்காக சட்டீஸ்கர், தமிழ்நாடு, மகாராஷ்டிரா, குஜராத் உள்ளிட்ட பல இடங்களுக்குப் பயணித்திருக்கிறார். குடும்பத்தை நடத்துவதற்காக  லாரி ஓட்டுநர் வேலையையும் அவர் விடவில்லை.