கடிதத்தில் காதல் இப்ப ஒர்க் அவுட் ஆகுமா..? பதில் சொல்கிறார் துல்கர் சல்மான்

பத்து வருடங்கள். 33 படங்கள், நல்ல நடிகர், தயாரிப்பாளர், பின்னணி பாடகர், வினியோகஸ்தர், கதை சொல்லி... என துல்கர் கிராஃப் அசுர வேகத்தில் சென்று கொண்டிருக்கிறது.

- ஷாலினி நியூட்டன்

மலையாள சூப்பர் ஸ்டாரின் மகனாக இருந்தும் நடிப்பைப் பற்றிய சிந்தனையே இல்லாமல் வெளிநாட்டில் சென்று வேலையிலும் சேர்ந்தவர். ஏதோ ஒரு சினிமா பந்தம் இழுக்க ‘லெட்'ஸ் கிவ் இட் ஏ டிரை' என நடிக்க ஆரம்பித்தவர் இதோ இன்று பல தயாரிப்பாளருக்கு லக்கி சார்ம் எனில் பெண் ரசிகைகளுக்கு சாக்லேட் பாய்.

மலையாளம், தமிழ், தெலுங்கு, இந்தி என களமிறங்கி தூள் கிளப்பிக் கொண்டிருக்கிறார் துல்கர் சல்மான்.

"எனக்கு நிறைய மொழிகள் கத்துக்க பிடிக்கும். நிறைய கத்துக்கிட்டேன். வெறும் சவுண்டை வெச்சே இது இந்த மொழி அந்த மொழின்னு சொல்லிடுவேன். ஒருவேளை அதுதான் இப்ப என் கரியருக்கே உதவி செய்யுதுன்னு நினைக்கிறேன்...” டிரேட் மார்க் புன்னகையுடன் பேசத் தொடங்கினார் துல்கர் சல்மான்.

10 வருட சினிமா பயணம்...என்ன கத்துக்கிட்டீங்க?

எனக்கு இந்த சினிமா எவ்வளவு பிடிச்சிருக்குங்கறதைக் கத்துக்கிட்டேன். நான் எந்த மொழில, எங்க நடிச்சாலும் என்னை ஏத்துக்கறாங்க. நான் ஆசீர்வதிக்கப்பட்டவனா நினைக்கிறேன். என்னை இயக்குற மிகப்பெரிய சக்தியா சினிமாவைப் பார்க்கறேன்.

நீங்க செல்லும் மொழியெங்கும் சிறப்பு கிடைக்கிதே... என்ன மேஜிக் அது?

அமெரிக்கால படிக்கும் போதே இந்தியர்கள் எல்லாம் அடிக்கடி ஒண்ணா சேர்வோம். அப்ப ஒவ்வொருத்தரும் அவங்க தாய்மொழில பேசுவாங்க.

இந்தியாவுடைய மொழிக் கலாசாரம் அங்கதான் எனக்குக் கிடைச்சது. அந்தத் திறமைதான் இப்ப எனக்குக் கை கொடுக்குது. நானும் அந்த மேஜிக்கை தேடி தான். எல்லா மொழிலயும் படங் கள் செய்யறேன். ஒருவேளை மேஜிக் இதுதான்னு தெரிஞ்சிட்டா இப்ப இருக்கறதை விட இன்னும் நிறைய சிறப்பு கிடைக்கும்னு தோணுது.

அப்பா மம்மூட்டி நடிக்காம விட்ட கதைகள் மிஸ் ஆகி இப்ப உங்ககிட்ட வருதோ..? வரிசையா பீரியாடிக் படங்களா இருக்கே?

ஹாஹா! அட இதை நான் இப்படி யோசிக்கல! ஆனா, அப்பாகூட 1970கள்ல தான் நடிக்க ஆரம்பிச்சார். எனக்கு 1960கள்ல நடக்குற கதைகளா வருது!