അജ്ഞാതൻ, ഏകാന്തപഥികൻ മൈക്കൽ കോളിൻസ്

പ്രചോദനത്തിന്റെ ജീവിതവഴികൾ

- അശ്വിൻ നായർ

ഏറെക്കാലമായി കാത്തിരുന്ന ലക്ഷ്യം കൺമുന്നിൽ വഴുതിപ്പോകുക, മറ്റുള്ളവർ അതു നേടുന്നത് ഒറ്റപ്പെടലിന്റെ വേദനയോടെ കണ്ടിരിക്കേണ്ടിവരിക; ജീവിതത്തിലെ ഏറ്റവും വിഷമകരമായ ഇത്തരം ഘട്ടങ്ങളിലൂടെ പലർക്കും കടന്നുപോകേണ്ടി വന്നിട്ടുണ്ടാകും. ഇതൊക്കെ ഭൂമിയിലെ മനുഷ്യർക്കു സാധാരണമാണല്ലോ എന്നു വിചാരിച്ചാൽ തെറ്റി. കാരണം, ഭൂമിക്കു പുറത്തും ഈ സങ്കടങ്ങളുണ്ടായിട്ടുണ്ട്. അതനുഭവിച്ചയാളുടെ പേര് മൈക്കൽ കോളിൻസ്.

1969 ജൂലൈയിലാണ് മനുഷ്യ രാശി ആദ്യമായി ആകാശത്തു ചരിത്രം കുറിച്ചത്. അത്രകാലം നിലാശോഭയോടെ തെളിഞ്ഞും ഒളിഞ്ഞും മനുഷ്യരാശിയെ മുഴുവൻ വിസ്മയിപ്പിച്ചു കൊണ്ടിരുന്ന ചന്ദ്രനിലേക്ക് നീൽ ആംസ്ട്രോങ്ങും എഡ്വിൻ ആൽഡിനും യാത്രാ പേടകമിറക്കി. ചന്ദ്രനിലെ ആദ്യ മനുഷ്യസ്പർശമായിരുന്നു അത്.

അനേകകോടി മനുഷ്യരിൽ തങ്ങളെമാത്രം തേടിയെത്തിയ മഹാഭാഗ്യത്തിൽ തന്റെ കൂട്ടുകാർ രോമാഞ്ചം പൂണ്ടുനിൽക്കുമ്പോൾ ചന്ദ്രനു ചുറ്റും കറങ്ങുകയായിരുന്നു മൈക്കൽ കോളിൻസ്. അപ്പോളോ-11 ചാന്ദ്രദൗത്യത്തിലെ കമാൻഡ് മൊഡ്യൂളിന്റെ പൈലറ്റ്. ചരിത്രത്തിലെ ഏറ്റവും വലിയ ഏകാന്തത അനുഭവിച്ചയാൾ. അപ്പോളോ ദൗത്യത്തിന്റെ ദുരന്തനായകൻ. 2021 ഏപ്രിലിലാണ് കോളിൻസ് ലോകത്തോട് വിട പറഞ്ഞത്; തന്റെ തൊണ്ണൂറാം വയസ്സിൽ. നീൽ ആംസ്ട്രോങ്ങും എഡ്വിൻ ആൽഡിനും ചന്ദ്രയാത്രയുടെ പേരിൽ എക്കാലവും ഓർമിക്കപ്പെടുമ്പോൾ, ദൗത്യത്തിലെ ഏറ്റവും പ്രഗത്ഭനും പരിചയസമ്പന്നനുമായ യാത്രികൻ അപ്പോഴേക്കും മറവിയുടെ ആകാശത്തിലേക്കു പതിയെ മറഞ്ഞു കഴിഞ്ഞിരുന്നു.