అల్లరి ఆర్య

ఆర్య అల్లరి పిల్లవాడు. అతని అల్లరి ఉపాధ్యాయు లను చాలా ఇబ్బంది పెడుతుండేది.

- కథ • కుముద్ కుమార్

ఆర్య అల్లరి పిల్లవాడు. అతని అల్లరి ఉపాధ్యాయు లను చాలా ఇబ్బంది పెడుతుండేది. అతని క్లాస్ టీచర్ మోనా మేడమ్ “ఆర్య, నువ్వు మంచిగా ఉండటం నేర్చుకోవాలి.

లేకపోతే ఏదో ఒక రోజు నీ అల్లరి నీకు పెద్ద సమస్యను తెచ్చి పెడుతుంది" అని చాలాసార్లు హెచ్చరించింది.

కానీ ఆర్య టీచర్ మాటలు పెడచెవిన పెట్టేవాడు. ఒక చెవిన విని మరొక చెవి నుంచి వదిలేసేవాడు.

ఈసారి ఆర్య ఒక కొత్త ట్రిక్ నేర్చుకున్నాడు.

అతను ఏదో విధంగా వివిధ జంతువులు, పక్షుల శబ్దాలను అనుకరించడం అలవాటు చేసుకున్నాడు.

ఒక రోజు మోనా మేడమ్ బ్లాక్ బోర్డు మీద ఏదో రాస్తున్నప్పుడు తరగతి గదిలో వెనుక నుంచి “మ్యావ్, మ్యావ్" అనే శబ్దం వచ్చింది.

విద్యార్థులందరూ వెనక్కి తిరిగి చూసారు.

ఆ శబ్దం విని మోనా టీచర్ వెంటనే “అయ్యో! ఈ పిల్లి ఎక్కడి నుంచి వచ్చింది? దాన్ని ఇక్కడి నుంచి తరిమేయండి" అన్నది.

క్లాసులో అందరూ నవ్వడం మొదలుపెట్టారు.

ఎంత వెతికినా పిల్లి మాత్రం కనిపించలేదు.

మోనా టీచర్ మళ్లీ బోర్డువైపు తిరిగేసరికి ఈసారి గట్టిగా "కాప్, కావ్" అనే శబ్దం వచ్చింది.

క్లాస్ రూంలోకి కాకి రాలేదు కాబట్టి ఇది ఏదో పిల్లవాడి అల్లరి అని మోనా టీచర్ కు వెంటనే అర్థమైంది. రెండు శబ్దాలు ఒకే చోటు నుంచి వచ్చాయని కూడా ఆమె గ్రహించింది.

ఆమె ఊహ నిజమే. ఆ రెండు శబ్దాలు ఆర్య సీటు దగ్గర నుంచే వచ్చాయి. ఇది ఆర్య చేస్తున్న కొత్త అల్లరి అని అర్థం చేసుకోవడానికి ఆమెకు ఎక్కువ సమయం పట్టలేదు.

ఆమె చాలాసార్లు ఆర్యకు ప్రేమగా నచ్చచెప్పడానికి ప్రయత్నించింది. కానీ ఆ రోజు ఆమెకు చాలా కోపం వచ్చింది. ఆమె అతడిని నేరుగా హెడ్ మాస్టర్ విజయ్ సింగ్ దగ్గరకు తీసుకెళ్లింది. ఆమె ఆర్యను ఆఫీసు బయట నిలబెట్టి, హెడ్ మాస్టర్కి అతని అల్లరి గురించి చెప్పడం ప్రారంభించింది.

“సార్, ఆర్య చాలా ఇబ్బంది పెడుతున్నాడు.

ఈసారి అతను ఒక కొత్త ట్రిక్ నేర్చుకున్నాడు.

జంతువులు, పక్షుల శబ్దాలను అనుకరిస్తున్నాడు” ఆమె మాట పూర్తి చేయక ముందే గట్టిగా భయంకరమైన “భౌ భౌ..." అనే శబ్దం వచ్చింది.

హెడ్ మాస్టర్ విజయ్ సింగ్కు కుక్కలంటే చాలా భయం. ఎందుకంటే చిన్నతనంలో అతడిని ఒక కుక్క కరిచింది. అప్పటి నుంచి అతడికి కుక్కలంటే భయం ఏర్పడింది. ఆ అరుపు విని అతను తన సీటు నుంచి లేచి “కుక్క! కుక్క!” అని అరుస్తూ భయంతో టేబుల్ కింద దాక్కున్నాడు.