അണ്ഡാശയ ക്യാൻസർ (Ovarian Cancer) ശ്രദ്ധിക്കേണ്ട കാര്യങ്ങൾ

അണ്ഡാശയത്തിൽ അസാധാരണമായ കോശങ്ങളുടെ നിയന്ത്രണമില്ലാ ത്ത വളർച്ച മൂലം ഉണ്ടാകുന്ന മുഴയാണ് അണ്ഡാശയ അർബുദം. സാധാരണയായി ഇത് അണ്ഡാശയത്തിന്റെ പുറംഭാഗം മൂടുന്ന എപ്പിത്തീലിയൽ കോശങ്ങളിൽ (Epithelial Cells) നിന്നാണ് ആരംഭിക്കുന്നത്. ചിലപ്പോൾ ബിജകോശങ്ങളിൽ (Germ Cells) നിന്നോ സോമൽ കോശങ്ങളിൽ (Stromal Cells) നിന്നോ വികസിക്കാനും സാധ്യതയുണ്ട്.

- ഡോ. ഷിബില കെ BAMS. MS(Ayu)

അണ്ഡാശയ ക്യാൻസർ സ്ത്രീകളിൽ കാണപ്പെടുന്ന ഏറ്റവും അപകടകാരിയായ ക്യാൻസറുകളിലൊന്നാണ്. ആരംഭഘട്ടങ്ങളിൽ ലക്ഷണങ്ങൾ വ്യക്തമായിരിക്കാത്തതിനാൽ, രോഗം കണ്ടത്തുമ്പോൾ അത് കൂടുതലായി വളർന്നിരിക്കാനുള്ള സാധ്യത കൂടുതലാണ്. അതുകൊണ്ട് ജാഗ്രതയും സമയോചിത പരിശോധനകളും അത്യാവശ്യമാണ്.

എന്താണ് അണ്ഡാശയ ക്യാൻസർ ?

സ്ത്രീകളുടെ പ്രത്യുൽപാദന വ്യവസ്ഥയിലെ അത്യന്തം പ്രധാനപ്പെട്ട അവയവങ്ങളാണ് അണ്ഡാശയങ്ങൾ (Ovaries). ബദാം രൂപത്തിലുള്ള ഈ രണ്ടു ഗ്രന്ഥികൾ ഗർഭപാത്രത്തിന്റെ ഇരുവശങ്ങളിലും സ്ഥിതി ചെയ്യുന്നു. ഇവയുടെ മുഖ്യധർമ്മം ഓരോ മാസവും അണ്ഡം (Ovum) ഉത്പാദിപ്പിക്കുകയെന്നതാണ്.

അണ്ഡാശയത്തിൽ അസാധാരണമായ കോശങ്ങളുടെ നിയന്ത്രണമില്ലാത്ത വളർച്ച മൂലം ഉണ്ടാകുന്ന മുഴയാണ് അണ്ഡാശയ അർബുദം. സാധാരണയാ യി ഇത് അണ്ഡാശയത്തിന്റെ പുറംഭാഗം മൂടുന്ന എപ്പിത്തീലിയൽ കോശങ്ങളിൽ (Epithelial Cells) നിന്നാണ് ആരംഭിക്കുന്നത്. ചിലപ്പോൾ ബീജകോശങ്ങളിൽ (Germ Cells) നിന്നോ സ്ട്രോമൽ കോശങ്ങളിൽ (Stromal Cells) നിന്നോ വികസിക്കാനും സാധ്യതയുണ്ട്. സ്ത്രീകളിൽ കണ്ടുവരുന്ന ക്യാൻസർ മരണങ്ങളിൽ ഇത് നാലാം സ്ഥാനത്താണ്. ലോകാരോഗ്യ സംഘടനയുടെ (WHO) 2020 ലെ റിപ്പോർട്ട് പ്രകാരം, ലോകമെമ്പാടും ഓരോ വർഷവും ഏകദേശം 3,13,959 പുതിയ കേസുകളും, 2,07,252 മരണങ്ങളും അണ്ഡാശയ അർബുദത്താലാണെന്ന് രേഖപ്പെടുത്തപ്പെടുന്നു.

കാരണങ്ങളും അപകട ഘടകങ്ങളും:

അണ്ഡാശയ അർബുദത്തിന് ഒരു ഏക കാരണവും ഇതുവരെ വ്യക്തമായിട്ടില്ല. എന്നാൽ താഴെ പറയുന്ന ഘടകങ്ങൾ രോഗ സാധ്യത വർദ്ധിപ്പിക്കുന്നതായി കണ്ടെത്തിയിട്ടുണ്ട്:

ജനിതക ഘടകങ്ങൾ (Genetic Factors): കുടുംബത്തിൽ അണ്ഡാശയം, സ്തന, അല്ലെങ്കിൽ കുടൽ ക്യാൻസറിന്റെ ചരിത്രമുണ്ടെങ്കിൽ.

പ്രായം: 50-60 വയസ്സിനിടയിലാണ് (ആർത്തവവിരാമത്തിനു ശേഷം) കേസുകളുടെ 60% കാണപ്പെടുന്നത്. എങ്കിലും, 20% കേസുകൾ യുവത്വത്തിലും ഉണ്ടാകാറുണ്ട്.

പ്രസവ ചരിത്രം: പ്രസവിക്കാത്ത സ്ത്രീകൾക്കും, 35 വയസ്സിന് ശേഷം ആദ്യ പ്രസവം നടത്തുന്നവർക്കും അപകടസാധ്യത കൂടുതലാണ്.