ലോനാവാല -മഹാനഗരിയുടെ കളിക്കൂട്ടുകാരി

ചിക്കി എന്നുപേരുള്ള മിഠായിക്കും ലോനാവാല പ്രസിദ്ധമാണ്

- 

മുംബൈയ്ക്കും പൂനയ്ക്കുമിടയിലുള്ള ഒരു ഹിൽസ്റ്റേഷനാണ് ലോനാവാല. മുംബൈ-പൂനെ എക്സ്പ്രസ്സ് ഹൈവേ കടന്നുപോകുന്നതും ഇതിലൂടെയാണ്. വിനോദസഞ്ചാരികൾക്കും പ്രകൃതിസ്നേഹികൾക്കും മലകയറ്റക്കാർക്കും പുരാവസ്തുഗവേഷകർക്കുമൊക്കെ ഒന്നുപോലെ പ്രിയപ്പെട്ട സ്ഥലമാണു ലോനാവാല. ഒട്ടനവധി മധുരാനുഭവങ്ങളാണ് ലോനാവാല ഇവർക്കൊക്കെയായി ഒരുക്കിയിരിക്കുന്നത്. ഇന്ത്യയിലെ തന്നെ ഏറ്റവും മികച്ച മഴക്കാല വിനോദ സഞ്ചാര കേന്ദ്രങ്ങളിൽ ഒന്നായ ലോനാവാല 'സഹ്യപർവ്വതത്തിലെ രത്നം' എന്നാണ് അറിയപ്പെടുന്നത്. മൂന്നുകിലോമീറ്റർ ദൂരത്തു ഖണ്ടാല എന്ന മറ്റൊരു സൗന്ദര്യധാമവും കൂടിയുണ്ട്.

1871- ൽ അന്നത്തെ ബോംബെ ഗവർണർ സർ എൽഫിൻസ്റ്റോൺ, ലോനാ വാലയെ കണ്ടെത്തുമ്പോൾ ജനവാസം കുറഞ്ഞ ഇടതോർന്ന വൃക്ഷങ്ങളുള്ള കാട്ടുപ്രദേശമായിരുന്നുവത്രെ. പക്ഷേ ഇവിടുത്തെ നിർമ്മലമായ അന്തരീക്ഷവും മനംമയക്കുന്ന പ്രകൃതിമനോഹാരിതയും ഭൂമിശാസ്ത്രപരമായ പ്രത്യേകതകളുമൊക്കെക്കൊണ്ട് വളരെപ്പെട്ടെന്നു തന്നെ സഞ്ചാരികളുടെ ഇഷ്ടസങ്കേതമായി മാറി. ലോനാവാല തടാകം,പാവന തടാകം, വളവൻ തടാകം,തുംഗാർലി തടാകം, വെ ള്ളച്ചാട്ടങ്ങൾ,ടൈഗർ പോയിന്റ്, ലയൺ പോയിന്റ്, ഡ്യൂക്സ് നോസ്, സഹസ്രാബ്ദങ്ങൾക്കുമുമ്പു മുമ്പു നിർമ്മിക്കപ്പെട്ട കാർല ഗുഹകൾ, ഭാജ ഗുഹകൾ, അത്രതന്നെ പഴക്കമില്ലാത്ത കോട്ടകൾ, ആധുനിക കാലത്തെ ശിവജി ഉദ്യാൻ, വൽവാൻ ഡാം, രാജ്മാച്ചി പോയന്റ്, ബുഷി ഡാം, ഡെല്ലാ അഡ്വഞ്ചർ, ടൈഗർ പോയിന്റ്, വാക്സ് മ്യൂസിയങ്ങൾ തുടങ്ങിയവയാണ് ഇവിടെത്തെ പ്രധാന കാഴ്ചകൾ. ഇന്ത്യയിലെ തന്നെ ഏറ്റവും വലിയ അഡ്വഞ്ചർ പാർക്കായ ഡെല്ലാ അഡ്വഞ്ചർ, ബംഗീ ജംബിംഗ് നടക്കപ്പെടുന്ന സ്ഥലം കൂടിയാണ്. 45 മീറ്റർ ഉയരത്തിൽ നിന്നാണ് ഇവിടെ ചാടാൻ അവസരം ലഭിക്കുക.

ചിക്കി എന്നുപേരുള്ള മിഠായിക്കും ലോനാവാല പ്രസിദ്ധമാണ്. ലോനാവാല ചിക്കി വിൽക്കുന്ന ധാരാളം വില്പനശാലകൾ ഇവിടെ ഇവിടെയുമുണ്ട് . മഗൻ ലാൽചിക്കിയാണ് ഏറ്റവും പ്രസിദ്ധം. നമ്മുടെ കടലമുട്ടായി പോലെ നിലക്കടല, അണ്ടിപ്പരിപ്പ്, എള്ള്, ബദാം, പലതരം ധാന്യങ്ങൾ, ഉണങ്ങിയ പഴങ്ങൾ എന്നിവയൊക്കെ ശർക്കരപ്പാനിയിലോ പഞ്ചസാരസിറപ്പിലോ ചേർത്തുണ്ടാക്കുന്ന മിഠായികളാണ് ചിക്കി.