സൂര്യാഘാതം; ശ്രദ്ധിക്കേണ്ട കാര്യങ്ങളും മുൻകരുതലുകളും

സൂര്യാഘാതത്തെക്കാൾ കാഠിന്യം കുറഞ്ഞ അവസ്ഥയാണ് സൂര്യതാപം (Sunburn). അതികഠിനമായ ചൂടിനെത്തുടർന്ന് വിയർപ്പിലൂടെ ശരീരത്തിൽ നിന്നും ധാരാളം ജലവും ലവണവും നഷ്ടപ്പെടുന്നു. കൂടാതെ കടുത്ത ദാഹം, ക്ഷീണം, തലവേദന, തലകറക്കം, പേശിവലിവ്, ഓക്കാനം, ഛർദി, മൂത്രത്തിന്റെ അളവ് കുറഞ്ഞ് മഞ്ഞനിറം ആവുക, ബോധക്ഷയം എന്നിവയാണ് സൂര്യതാപത്തിന്റെ പ്രാരംഭ ലക്ഷണങ്ങൾ.

- ഡോ. ഷിബില കെ BAMS. MS(Ayu)

ഓരോ വർഷവും ചൂടുകൂടി വേനൽക്കാലം അസഹനീയമായി കൊണ്ടിരിക്കുകയാണ്. അതികഠിനമായ വേനൽ ചൂടുകാരണം ഉണ്ടാകുന്ന ആരോഗ്യപ്രശ്നങ്ങളിൽ ഗുരുതരമായ ഒന്നാണ് സൂര്യാഘാതം. ലോകത്താകമാനം അയ്യായിരത്തിൽ പരം ആളുകൾ ഓരോ വർഷവും സൂര്യാഘാതത്താൽ മരണപ്പെടുന്നു. വെയിലത്ത് ജോലി ചെയ്യുന്ന തൊഴിലാളികൾ, കുട്ടികൾ, മുതിർന്നവർ (65 വയസ്സിനു മുകളിൽ), അമിതവണ്ണം, പ്രമേഹം, ഹൃദ്രോഗം, വൃക്ക രോഗം, ത്വക്ക് രോഗം തുടങ്ങിയ രോഗമുള്ളവർ എന്നിവർക്കാണ് സൂര്യാഘാതം ഉണ്ടാകാൻ സാധ്യത കൂടുതൽ.

അന്തരീക്ഷ താപം ഒരു പരിധിക്കപ്പുറം ഉയരുമ്പോൾ നമ്മുടെ ശരീരത്തിലെ താപ നിയന്ത്രണ സംവിധാനങ്ങൾ തകരാറിലാവുകയും ശരീരത്തിലെ ചൂടിനെ പുറന്തള്ളാൻ കഴിയാതെ വരികയും ചെയ്യുന്നു. ഇതേ തുടർന്ന് ശരീരത്തിലെ ആന്തരിക അവയവങ്ങളുടെ പ്രവർത്തനങ്ങൾ തകരാറിൽ ആവുകയും ചെയ്യുന്ന അവസ്ഥയാണ് സൂര്യാഘാതം (Sunstroke ). ക്രമാതീതമായി ഉയർന്ന ശരീര ഊഷ്മാവ്, ചർമ്മം ചുവന്ന് തടിക്കുക, പൊള്ളലേൽക്കുക, ശക്തമായ തലവേദന, തലകറക്കം, കണ്ണുകൾക്ക് തളർച്ച, നേർത്ത വേഗതയിലുള്ള നാഡീ മിടുപ്പ്, ശ്വസന പ്രക്രിയ സാവധാനത്തിലാകുക, മാനസിക പിരിമുറുക്കം എന്നിവയും ഇതേ തുടർന്നുള്ള അബോധാവസ്ഥ തുടങ്ങിയവയാണ് സൂര്യാഘാതം ഏറ്റാൽ പ്രകടമാകുന്ന ലക്ഷണങ്ങൾ.