ഗർഭാശയഭ്രംശം അഥവാ Uterine Prolapse

പുറത്തു പറയാനുള്ള മടിയോ അറിവില്ലായ്മ കാരണമോ സ്ത്രീകൾ ഇത്തരം അവസ്ഥകൾക്ക് ചികിത്സ തേടാറില്ല.പലപ്പോഴും അനുബന്ധ പ്രശ്നങ്ങൾ ആയി വരുമ്പോഴാണ് ഇവ കണ്ടെത്തുന്നത്. ആരംഭത്തിൽ തന്നെ ചികിത്സിക്കേണ്ടത് വളരെ പ്രധാനമാണ്. രോഗിയുടെ പ്രായം ഗർഭാശയ ഭ്രംശത്തിന്റെ ലക്ഷണങ്ങൾ എന്നിവയെല്ലാം പരിഗണിച്ചാണ് ചികിത്സാരീതി തീരുമാനിക്കുന്നത്.

- ഡോ. ഷിബില കെ BAMS. MS(Ayu)

സ്ത്രീകളിലെ പ്രധാന പ്രത്യുൽപാദനാവയവമായ ഗർഭാശയം (Uterus) സ്ഥിതി ചെയ്യുന്നത് പെൽവിസിലാണ്. ഗർഭാശയത്തെ മൂത്രാശയത്തിനും മലാശയത്തിനും ഇടയിൽ പെൽവിക് പേശികളാലും (Pelvic floor muscles) അസ്ഥിബന്ധങ്ങളാലും (Ligaments) താങ്ങിനിർത്തപ്പെടുന്നു. ഈ പേശികളോ അസ്ഥിബന്ധങ്ങളോ ഏതെങ്കിലും കാരണത്താൽ ദുർബ്ബലമാകുമ്പോൾ അവയ്ക്ക് ഗർഭാശയത്തെ പിന്തുണയ്ക്കാൻ കഴിയാതെ വരികയും ഗർഭപാത്രം യോനിയിലേക്ക് (Vagina) ഇറങ്ങുകയോ പുറത്തേക്ക് തള്ളി നിൽക്കുകയോ ചെയ്യുന്ന അവസ്ഥയുണ്ടാകുന്നു. ഇതിനെയാണ് ഗർഭാശയഭ്രംശം എന്നറിയപ്പെടുന്നത്. സാധാരണയായി ഏതു പ്രായത്തിലുള്ള സ്ത്രീകളിലും ഈ അവസ്ഥ കാണാറുണ്ട്. എന്നാൽ കുറഞ്ഞ ഇടവേളകളിൽ ഒന്നി ലധികം തവണ പ്രസവിച്ച സ്ത്രീകളിലും ആർത്തവവിരാമത്തോടടുത്ത് നിൽക്കുന്നവരിലുമാണ് ഗർഭാശയഭ്രംശം കൂടുതലായി കാണപ്പെടുന്നത്.

കാരണങ്ങൾ:

പ്രസവസമയത്ത് യോനിയിൽ ഉണ്ടാകുന്ന സമ്മർദ്ദം / ആഘാതം.(Eg: Big baby,forceps delivery, vacuum delivery etc).

ആർത്തവ വിരാമത്തോടനുബ ന്ധിച്ച് ഉണ്ടാകുന്ന ഹോർമോണുകളുടെ അസന്തുലിതാവസ്ഥ (Post menopausal atrophy) പേശികളുടെ ബലക്ഷയത്തിന് കാരണമാകുന്നു.

തൊഴിൽ പരമായി നല്ലഭാരം എടുക്കുന്നത്.

വിട്ടുമാറാത്ത ചുമ, തുമ്മൽ, മലബ ന്ധം മുതലായവ പേശികൾക്ക് അമിത സമ്മർദ്ദം ഉണ്ടാക്കുകയും അവയുടെ ബല ഹീനതയ്ക്ക് കാരണമാകുകയും ചെയ്യുന്നു.

അമിതമായ പൊണ്ണത്തടി, പെൽ വിക് പേശികൾക്ക് അധിക ആയാസം ഉണ്ടാക്കുന്നു.