பி.ஆர்.பி. கிரானைட் நிறுவனத்துக்கு எதிரான வழக்குகளை ரத்து செய்ய உயர்நீதிமன்றம் மறுப்பு

பி.ஆர்.பி. கிரானைட் நிறுவனத்துக்கு எதிரான வழக்குகளை ரத்து செய்ய மறுத்த சென்னை உயர்நீதிமன்ற மதுரை அமர்வு, இந்த நிறுவனத்துக்கு எதிரான வழக்குகளின் விசாரணையை 3 மாதங்களுக்குள் முடிக்க வியாழக்கிழமை உத்தரவிட்டது.

- 

மதுரை மாவட்டத்துக்குள் பட்ட மேலூரில் அனுமதிக்கப்பட்ட இடத்தில் அளவுக்கு அதிகமாகக் கிரானைட் கற்களை வெட்டி எடுத்தது, அனுமதிக்கப்படாத இடங்களிலும் சட்ட விரோதமாக கிரானைட் கற்களை வெட்டியது, சட்ட விரோதப் பணப் பரிமாற்றம் மூலம் பல நூறு கோடி ரூபாய் மதிப்பில் சொத்துகளை வாங்கியது உள்ளிட்ட குற்றச்சாட்டுகளின் கீழ் பி.ஆர்.பி. கிரானைட்ஸ் நிறுவன உரிமையாளர், நிர்வாகிகள் மீது கடந்த 2012-13-ஆம் ஆண்டுகளில் வழக்குகள் பதிவு செய்யப்பட்டன. மேலும், அரசுக்கு சுமார் ரூ. 7 ஆயிரம் கோடிக்கும் அதிகமாக வருவாய் இழப்பை ஏற்படுத்தியதாகவும், சுமார் ரூ. 13 ஆயிரம் கோடிக்கும் அதிகமான மதிப்பில் கனிம வள இழப்பை ஏற்படுத்தியதாகவும் பி.ஆர்.பி. கிரானைட்ஸ் நிறுவன நிர்வாகிகள் மீது பல்வேறு வழக்குகள் பதிவு செய்யப்பட்டன.