பதிவுத்துறை டெண்டர் முறைகேடு பேரம் பற்றி சொல்கிறார் wiki யானந்தா

நண்பரை வழியனுப்புவதற்காக சென்னை சர்வதேச விமான நிலையத்துக்கு வந்திருந்தார் விக்கியானந்தா. கூடவே பேச்சுத் துணைக்கு பீட்டர் மாமாவையும் கூட்டி வந்திருந்தார். நண்பரை வழியனுப்பிவிட்டு வீடு திரும்பிக் கொண்டிருக்கும் வழியில், வழக்கம்போல் கேள்விக் கணைகளைத் தொடுக்கத் தொடங்கினார் பீட்டர் மாமா.

- 

தூங்கா நகர தோட்டத்திற்கு உயர் அதிகாரிகள் களப்பணிக்குப் போனால் புதைக்கப்பட்ட நிறைய உண்மைகள் வெளிவருமாமே.." எனக் கேட்டார்.

"ஆரம்பிச்சிட்டியா... சரி சொல்றேன்.." எனச் சிரித்தபடி சொல்லத் தொடங்கினார் விக்கியானந்தா.

"தூங்கா நகரில் பெரிதும் கண்டுகொள்ளப்படாத தோட்டத்துறையில் சொட்டுநீர்ப் பாசனம் தொடங்கி சகலத்திலும் கல்லா கட்டி வருகிறாராம் உச்சப் பொறுப்பில் உள்ள ஒரு பெண் அதிகாரி. இலைப் பிரமுகர்களுக்கு ஆதரவாகச் செயல்படும் இவரது நடவடிக்கைகள், இங்கு பணிபுரியும் சக ஊழியர்கள் மட்டுமின்றி, அலுவலகத்துக்கு வரும் மக்களுக்கும் பெரும் அதிருப்தியை ஏற்படுத்தியிருக்காம். உச்ச அதிகாரிக்கு உடந்தையாகக் கண்ணழகி நடிகை பெயர் கொண்ட ஒருவரும் செயல்படுவதால் 13 வட்டாரங்களில் உள்ள உதவி அதிகாரிகளின் நிலை பரிதாபத்திற்குரியதாக இருக்கிறதாம். தொடர்ந்து பயனாளிகள் லிஸ்ட் போட்டு இவர்கள் காண்பிக்கும் கணக்கு, காந்திக் கணக்கையே மிஞ்சி விடுகிறதாம். இவர்களது இந்த நடவடிக்கைகள் அனைவரையும் தொடர்ந்து அதிருப்திக்குள்ளாக்கி வருகிறதாம். உயர் அதிகாரிகள் நேரடியாகக் களப்பணிக்குச் சென்று ஆய்வு நடத்தினால் தோட்டத்தில் புதைக்கப்பட்ட பல உண்மைகள் வெளிவரலாம் என்கின்றனர் பசுமை ஆர்வலர்கள்.." என்றார் விக்கியானந்தா.

"பல லட்சம் செலவு செய்ய வேண்டியிருக்கும் என்பதால் பல மா.செ.க்கள் சேலத்துக்காரர் சுற்றுப்பயண லிஸ்டில் தங்களது மாவட்டத்தைப் பின்வரிசைக்குக் கொண்டு போயிடுறாங்களாமே.." என்றார் பீட்டர் மாமா.