തലൈവർ തമ്പി

ഫാലിമി, തലൈവർ, തമ്പി, തലൈമ എന്നീ ഹിറ്റ് സിനിമകളുടെ സംവിധായകൻ നിതീഷ് വാസുദേവ്...

- വി.ആർ, ജ്യോതിഷ്

തമിഴ്നാട്ടിൽ വീണ്ടുമൊരു മലയാളി താരോദയം, നിതീഷ് വാസുദേവ്. ബേസിൽ ജോസഫ് നായകനായ ഫാ ലിമി' എന്ന സൂപ്പർ ഹിറ്റ് സിനിമയിലൂടെ മലയാളത്തിലിടം നേടിയ നിതീഷ് ജീവ നായകനായ തലൈവർ, തമ്പി, തലൈമയിലൂടെയാണ് തമിഴിലെ സൂപ്പർ സംവിധായകരുടെ നിരയിൽ ഇടംപിടിച്ചത്.

തിരുവനന്തപുരം പാപ്പനംകോട് സ്വാതി ലൈനിലെ നിതീഷിന്റെ വീട്ടിൽ പുതിയ വിശേഷങ്ങൾക്കൊപ്പം.

എൻജിനീയറിങ് പഠിച്ച ഒരാൾ എങ്ങനെയാണ് തമിഴിലും മലയാളത്തിലും ഒരുപോലെ ഹിറ്റ് സംവിധായകനായത്?

എന്റെയീ വീടിരിക്കുന്ന സ്ഥലത്തിന്റെ പ്രത്യേകത എന്താണെന്നറിയാമോ? ഈ ലൈനിലെ താമസക്കാരിൽ ഭൂരിപക്ഷവും സർക്കാർ ജീവനക്കാരും ബാങ്ക് ഉദ്യോഗസ്ഥരുമാണ്. അതുകൊണ്ട് തന്നെ ഇവിടത്തെ കുട്ടികൾക്കും ആ രീതിയിൽ വളർന്നു വരാൻ തോന്നും. എന്റെ അവസ്ഥയും വ്യത്യസ്തമായിരുന്നില്ല. അച്ഛൻ ജെ. സഹദേവൻ, അമ്മ വി. ലീല രണ്ടുപേരും സർക്കാർ ജീവനക്കാർ. എന്റെ കലാതാൽപര്യങ്ങൾക്ക് രണ്ടു പേരും എതിരൊന്നും പറഞ്ഞിട്ടില്ല. തിരുവനന്തപുരത്ത് ജവഹർ ബാലഭവൻ എന്നൊരു സ്ഥാപനമുണ്ട്. അവിടെ വെക്കഷൻ സമയത്തു രണ്ടു മാസം കലാപരിശീലനക്ലാസുകൾ ഉണ്ട്.

നാടകമായിരുന്നു എന്റെ വിഷയം. ഇന്ന് ആലോചിക്കുമ്പോൾ ആ നാടകക്ലാസുകളാണു സിനിമയിലേക്കുള്ള എന്റെ അടിസ്ഥാന വിദ്യാഭ്യാസം എന്നു തോന്നുന്നു.

സിനിമ മനസ്സിൽ കയറുന്നതെങ്ങനെയാണ്?

നന്നായി പഠിക്കുക, ജോലി വാങ്ങുക എന്നതിന് പ്രാധാന്യമുള്ള അന്തരീക്ഷത്തിലാണു വളർന്നതെന്നു പറഞ്ഞല്ലോ. തിരുവനന്തപുരത്ത് കരമന മന്നം മെമ്മോറിയൽ റെസിഡൻഷ്യൽ സ്കൂളിലാണു പഠിച്ചത്. പിന്നീട് നെടുമങ്ങാട് മോഹൻദാസ് കോളജ് ഓഫ് എൻജിനീയറിങ്ങിലും പഠിച്ചു. എങ്കിലും സിനിമ തന്നെയായിരുന്നു മനസ്സിൽ. സിനിമ എങ്ങനെയോ മനസ്സിൽ കയറിക്കൂടുകയായിരുന്നു. അത് എപ്പോഴാണെന്ന് അറിയില്ല.