ഞാൻ ഫെമിനിച്ചിയാണ്

മികച്ച നടിക്കുള്ള അവാർഡ് നേടിയ ഷംല പറയുന്നു, ജോലി ചെയ്തുള്ള ജീവിതം ഫെമിനിസമെങ്കിൽ...

- ബൈജു ഗോവിന്ദ്

വലുതാവുമ്പോൾ ആരാകാനാണ് ആഗ്രഹമെന്നു ടീച്ചർമാർ ചോദിച്ചപ്പോഴൊക്കെ എൻജിനീയറാകണമെന്ന് ആവർത്തിച്ചു പറഞ്ഞിരുന്ന പെൺകുട്ടി. ലക്ഷ്യത്തിലേക്കുള്ള ദൂരം അവൾ സമർഥമായി പിന്നിട്ടു. ഉയർന്ന മാർക്കോടെ എൻജിനീയറിങ് ബിരുദം നേടി. സ്വന്തം നാട്ടിലെ രണ്ടു കോളജുകളിൽ അധ്യാപികയായി. പിന്നെ, ജോലിക്കായി ദുബായിലേക്ക്.

പക്ഷേ, ജീവിതം ഷംലയ്ക്കു വേണ്ടി പിന്നെയുമൊരു സർപ്രൈസ് ഒളിച്ചു വച്ചിരുന്നു. കുറച്ചു ദിവസം മുൻപ് ആ സമ്മാനം മാന്ത്രികപ്പൊതിയഴിഞ്ഞു നക്ഷത്രശോഭയിൽ പ്രകാശിച്ചു. അങ്ങനെ, മലയാള ചലച്ചിത്രലോകത്തു ഷംല ഹംസ എന്ന പേരിൽ പുതിയൊരു താരോദയമുണ്ടായി.

സംസ്ഥാന സർക്കാരിന്റെ മികച്ച നടിക്കുള്ള അവാർഡ് നേടിയ ഷംല ഇപ്പോൾ മലപ്പുറത്തിനു സമീപം എടപ്പാളിലെ വീട്ടിലുണ്ട്. അഭിനന്ദനം അറിയിക്കാൻ പല ദിക്കുകളിൽ നിന്നു വരുന്നവരുമായി സ്നേഹോപചാരങ്ങളുടെ തിരക്കിലാണു താരമായി മാറിയ ഷംല.

അഭിനയം വന്ന വഴി ?

നമ്മുടെ നാട്ടിൽ സിനിമപോലെ നാടകങ്ങൾ പ്രദർശിപ്പിക്കപ്പെട്ടിരുന്ന കാലത്തു മലബാറിൽ അറിയപ്പെടുന്ന നടനായിരുന്നു എന്റെ ഉപ്പ ഹംസം തൃത്താല. ഉമ്മ ഫാത്തിമക്കുട്ടി. ഞങ്ങൾ നാലു മക്കളാണ്. മക്കളെ നോക്കാൻ വേണ്ടി ഉപ്പ നാടകാഭിനയവും കലാപ്രവർത്തനങ്ങളും ഉപേക്ഷിച്ചു. ഉപ്പയുടെ നാടകബന്ധം വഴി കുട്ടിക്കാലത്തേ കുറേയധികം നാടകങ്ങൾ കാണാൻ കഴിഞ്ഞു. ഉപ്പയുടെ മകളായതു കൊണ്ടാകാം പിൽക്കാലത്തു സിനിമയിൽ അഭിനയിക്കാൻ സാധിച്ചത്.

എനിക്ക് അവാർഡ് കിട്ടിയെന്നറിഞ്ഞപ്പോൾ ഏറ്റവുമധികം സന്തോഷിച്ചത് ഉപ്പയാണ്. ഭർത്താവു സാലിഹും അദ്ദേഹത്തിന്റെ ബന്ധുക്കളും അളവില്ലാതെ നൽകുന്ന പിന്തുണയാണ് ഈ അവാർഡിലേക്ക് എന്നെ എത്തിച്ചത്.

കുട്ടിക്കാലം, സ്കൂൾ ഓർമകൾ ?

എന്റെ നാട് പാലക്കാട് ജില്ലയിലെ തൃത്താലയാ ണ്. എൽപി സ്കൂളിൽ പഠിക്കുന്ന കാലത്തേ ഒപ്പനയ്ക്കും പാട്ടുപാടാനുമൊക്കെ ചേരുമായിരുന്നു. സമ്മാനങ്ങളും കിട്ടിയിട്ടുണ്ട്.