നാടു കാണാൻ വരണൊണ്ടേ ആടിവേടൻ

പൊന്നിൻ ചിങ്ങത്തെ വരവേൽക്കാൻ, കർക്കടകത്തിലെ ആധിവ്യാധികളൊഴിക്കാൻ വടക്കൻ കേരളത്തിൽ ആടിവേടനിറങ്ങുമ്പോൾ

- രാഖി റാസ്

ഇടവപ്പാതി തുടങ്ങിയാൽ വടക്കൻ കേരളത്തിലെ പാടവരമ്പത്തും നാട്ടുവഴികളിലും ഈ കുഞ്ഞുദൈവങ്ങളെ കണ്ടുതുടങ്ങും.

ചോപ്പ് ഉടയാട ചാർത്തി, ചായില്യം കൊണ്ടു മുഖത്തെഴുതി, മെയ്യാഭരണങ്ങളണിഞ്ഞു, വെള്ളി താലികൾ ഇടകിയാടുന്ന തിരുമുടി മേലേ തലയുയർത്തി നിൽക്കുന്ന നാഗബിംബവുമായി ചെണ്ടയുടെ അകമ്പടിയോടെ ആടിവേടൻ വീടുവീടാന്തരം സന്ദർശനത്തിനിറങ്ങുന്ന കാലമാണത്.

ഇടവം മുതൽ തുലാമാസം പത്താം തീയതി വരെ മലബാറിൽ തെയ്യാട്ടങ്ങൾക്ക് അവധിക്കാലമാണ്. അക്കാലത്താണു കുട്ടിത്തെയ്യങ്ങൾ അഥവാ കർക്കടക തെയ്യങ്ങളുടെ വരവ്. അതിൽ പ്രധാനമാണ് ആടിവേടൻ. ആടി മാസത്തിലെ വേടൻ തെയ്യം എന്നർഥത്തിലും ശ്രീപാർവതിയും (ആടി) പരമേശ്വരനും (വേടൻ) എന്ന അർഥത്തിലും ആടിവേടൻ എന്നുപയോഗിക്കാറുണ്ട്. പക്ഷേ, ഇരു തെയ്യങ്ങളും ഒന്നിച്ച് ഇറങ്ങാറില്ല. വടക്കൻ കേരളത്തിൽ ആധിവ്യാധികളകന്ന് ഐശ്വര്യപൂർണമായി ചിങ്ങമെത്തണമെങ്കിൽ ആടിവേടൻ വന്നേ തീരൂ.

മണികിലുക്കി ചുവട് വച്ച്

വീടുകളുടെ മുറ്റത്തെത്തിയാൽ ഒറ്റച്ചെത്താളത്തിനും ആടിവേടൻ പാട്ടിനുമൊപ്പിച്ചു കയ്യിലെ കുടമണികിലുക്കി വട്ടത്തിൽ ചുവടുകൾ വച്ചു കളിയാടും. ഇതോടെ വിനാശകാരികളായ ജ്യേഷ്ഠകൾ വീടുവിട്ടൊഴിയുകയും ശ്രീയുടെയും സമ്പത്തിന്റെയും അധിദേവതയായ ലക്ഷ്മീ ദേവി കുടിയേറുകയും ചെയ്യുമെന്നാണു വിശ്വാസം.