ഇപ്പോഴിതെല്ലാം ഒഴിവാക്കാം

ഗർഭകാലത്തു നിർബന്ധമായും ഒഴിവാക്കേണ്ട സൗന്ദര്യസംരക്ഷണ മാർഗങ്ങൾ

- തയാറാക്കിയത്: അമ്മു ജൊവാസ്

ഗർഭകാലത്ത് ചർമപ്രശ്നങ്ങളോർത്തുള്ള ടെൻഷൻ സാധാരണമാണ്. അൽപം സൗന്ദര്യപരി പാലന വഴികൾ പരീക്ഷിക്കാമെന്നു തോന്നിയാലും ഇടംവലം നോക്കാതങ്ങു ചെയ്യാൻ പറ്റില്ലല്ലോ. കുഞ്ഞു സേഫ് ആണോ എന്ന ചിന്തയാകും ആദ്യം മനസ്സിൽ വരുന്നത്. അതുകൊണ്ട് എന്തൊക്കെയാണ് സേഫ് അല്ലാത്തതെന്നു മനസ്സിലാക്കാം.

ഗർഭിണി ഹെയർ കളർ ചെയ്താൽ

ഹെയർ കളറിൽ പ്രത്യേകിച്ച് ഹെയർ ഡൈകളിൽ ആരോഗ്യത്തിനു ഹാനികരമായ ബെൻസീൻ, അമോണിയ, പിപി ഡി എന്നിങ്ങനെയുള്ള ഘടകങ്ങളുണ്ട്. ഇവ കുഞ്ഞിന്റെ ശാരീരികവും മാനസികവുമായ വളർച്ചയെ ബാധിക്കുമെ ന്നതിന് പഠനങ്ങളുടെ അടിസ്ഥാനമൊന്നുമില്ല. എങ്കിലും ആരോഗ്യത്തിനു മോശമായവയെ മാറ്റിനിർത്തുന്നതാകും അഭികാമ്യം.

നാചുറൽ ഹെയർ കളർ എന്നെഴുതിയത് എല്ലാം അത "നാചുറൽ' ആകണമെന്നില്ല. നര മറയ്ക്കാൻ തൽക്കാലം വീട്ടുമുറ്റത്തെ മൈലാഞ്ചിയും നീലയമരിയും മതി. അകാല നര മൂലം ആത്മവിശ്വാസമില്ലാതെ ഗർഭകാലത്തു വിഷാദത്തിന് അടിമപ്പെടുന്നവരുണ്ട്. അത് ആരോഗ്യത്തിന് കൂടുതൽ ദോഷകരമാകാം എന്നോർക്കുക.

സൺസ്ക്രീൻ മറക്കരുത്

ഗർഭകാലത്തെ ഒട്ടുമിക്ക ചർമപ്രശ്നവും പിഗ്മെന്റേഷൻ സംബന്ധമായുള്ളതാണ്. ഹോർമോൺ വ്യതിയാനം ഇതിനൊരു കാരണമാണ്. ചർമം സെൻസിറ്റിവ് ആകുന്നതിനാൽ നേരിയ സൂര്യപ്രകാശം പോലും കരിവാളിപ്പുണ്ടാക്കാം.