കരുതിയിരിക്കാം കോളറയെ

മരണഭീതിയുണ്ടാക്കി കോളറ വീണ്ടുമെത്തുമ്പോൾ അറിയാം രോഗലക്ഷണങ്ങളും ചികിത്സയും പ്രതിരോധ മാർഗങ്ങളും

- ശ്യാമ

കേരളത്തിൽ വീണ്ടും കോളറ മരണം റിപ്പോർട്ട് ചെയ്യപ്പെട്ടിട്ട് അധികം മാസങ്ങളായിട്ടില്ല. പൂർണമായും തുടച്ചു നീക്കിയെന്നു കരുതി യിരുന്ന രോഗം വീണ്ടും പ്രത്യക്ഷപ്പെടുന്നത് പല വിധേനയുള്ള ആശങ്കകൾക്കു വഴി വച്ചിട്ടുണ്ട്. എന്നാൽ ഭയത്തേക്കാൾ ഉപരി ജാഗ്രതയും അറിവുമാണ് പ്രതിസന്ധിയും നേരിടാനുള്ള മികച്ച ആയുധങ്ങൾ.

കോളറ എന്താണെന്നും എങ്ങനെ പടർന്നുപിടിക്കുന്നുവെന്നും ലക്ഷണങ്ങൾ എന്തെല്ലാമെന്നും അറിഞ്ഞു വയ്ക്കാം. ഒപ്പം പ്രതിരോധ മാർഗങ്ങൾ മനസ്സിലാക്കി മുന്നോട്ടു നീങ്ങാം.

അറിയാം കോളറയെ

വെള്ളത്തിൽ കൂടി പകരുന്ന രോഗമാണു കോളറ, വിബിയോ കോളറ എന്ന ബാക്ടീരിയയാണ് രോഗം പടർത്തുന്നത്. രോഗം ബാധിച്ചാലും പലപ്പോഴും ഇത് കോളറയാണെന്നു തിരിച്ചറിയാൻ പലരും വൈകും. 7-14 ദിവസം വരെ ഇവരുടെ മലത്തിലൂടെ രോഗവാഹിയായ ബാക്ടീരിയ പുറന്തള്ളപ്പെടാനും മറ്റുള്ളവരിലേക്കു രോഗം പടരാനും സാധ്യതയുണ്ട്.

വൃത്തിഹീനമായ വെള്ളത്തിൽ നിന്നും (കാഴ്ചയിൽ അങ്ങനെ തോന്നണമെന്നില്ല) അതുപയോഗിച്ച് പാകം ചെയ്യുന്ന ഭക്ഷണത്തിൽ നിന്നുമാണ് ബാക്ടീരിയ നമ്മുടെ ശരീരത്തിലെത്തി രോഗം പടർത്തുന്നത്. രോഗം മൂലമുള്ള നിർജലീകരണം വളരെ വേഗത്തിലാണു നടക്കുക. അതു വഴി ആളുകൾ ഷോക്കിലായി പോകാനും ഇടയുണ്ട്. കൃത്യ സമയത്ത് ആശുപത്രിയിലെത്തിച്ച് ഐവി ഫ്ലൂയിഡും ചികിത്സയും നൽകിയില്ലെങ്കിൽ മണിക്കൂറുകൾക്കകം തന്നെ രോഗി മരണപ്പെടാം.

കുട്ടികളിലാണ് കോളറ വരുന്നതെങ്കിൽ നോക്കി നിൽക്കുന്ന നേരം കൊണ്ടാണ് നിർജലീകരണം നടന്നു കുട്ടി തളർച്ചയിലേക്കും അബോധാവസ്ഥയിലേക്കും മറ്റും പോകുന്നത്.

കോളറ പടരുന്ന സാഹചര്യത്തിൽ അതു തടയാൻ കോളറ പ്രതിരോധ വാക്സീൻ എടുക്കാവുന്നതാണ്. രണ്ടു തവണയായി എടുക്കേണ്ട വാക്സീൻ രണ്ടു - മൂന്നു വർഷം വരെ കോളറയിൽ നിന്നു ശരീരത്തെ പ്രതിരോധിക്കും.