அழகும்; ஆரோக்கியமும் யோகக்கலையுடன் தொடர்புடையது!

உடலையும் மனதையும் இணைத்து ஒருவரின் ஒட்டுமொத்த நல்வாழ்வை மேம்படுத்தும் அற்புதமான கலை நமது பாரம்பரியமிக்க யோகக்கலை என்றால் அது கொஞ்சமும் மிகையாகாது.

- தனுஜா ஜெயராமன்

யோகா செய்வதன் மூலம் ஒருவரது உடல் தோற்றம் அழகாகிறது, மன அமைதி கிடைக்கிறது” என்கிறார் பிளாரன்ஸ் ஹெலன் நளினி. உலக பிரபஞ்ச அழகிப் பட்டம் பெற்றிருக்கும் இவர் உளவியலாளர், தொழில் முனைவோர், எழுத்தாளர், மொழியியலாளர் மற்றும் யோகா பயிற்சியாளர் என பன்முகங்களை கொண்டவர். யோகா மீதிருந்த ஆர்வம் காரணமாக சென்னை பல்கலைக்கழகத்தில் டிப்ளமோ இன் யோகா படித்துள்ளார்.

யோகா மீது ஆர்வம்...

2021ம் ஆண்டு இந்தியாவில் கொரோனா பாதிப்பு உச்சக்கட்டத்தை அடைந்திருந்தது. கொரோனா மற்றும் நிமோனியாவால் நான் கடுமையாக பாதிக்கப்பட்டிருந்தேன். உயிர் பிழைப்பேனா என்று நினைத்தேன். கிட்டத்தட்ட மரணத்தின் வாசலை தொட்டு விட்டு நான் இன்று உயிரோடு நடமாடிக் கொண்டிருக்க காரணமாக இருந்தது நான் பயின்ற யோகாசனக் கலைதான். அந்த சமயத்தில் யோகாசனம் மற்றும் பிராணாயாமம் பயிற்சிகளை மேற்கொண்டேன். எனது கணவரும், மகள்களும் எனக்கு மேலும் ஊக்கம் கொடுத்தார்கள். இதெல்லாம் சேர்ந்துதான் கொடிய நோயை எதிர்த்து போராடி மீண்டு வந்தேன். அதன்பிறகு நடனம், உடற்பயிற்சி, நீச்சல், யோகா என என்னை முழுவதுமாக தயார்படுத்திக் கொண்டு உலக அழகிப் போட்டி on! களில் கலந்து கொண்டேன்.