உள்ளத்தில் நல்ல உள்ளம்..!

'சாந்தா இருதயா மருத்துவமனை‘ வண்ண விளக்கு களால் ஜொலித்தது.

- By நெல்லை தி.வள்ளி

அந்த மிகப்பெரிய மருத்துவ மனையில் மேலும் இரண்டு கட்டடங்கள் புதிதாய் அன்று திறக்கப்பட இருந்தன. டாக்டர் ஸ்ரீதர் மனம் முழுக்க சந்தோஷத்தில் திளைத்துக் கொண்டிருந்தார். எவ்வளவு நாளாக ஆசைப்பட்டு கொண்டிருந்தது.. அவருடைய நெடுநாள் கனவு.. அன்று நிறைவேறுகிறது.

இரண்டு கட்டடத்தில் ஒன்று பிரத்யேகமாக இருதய சிகிச்சைக்கென கட்டப்பட்டிருந்தது. பலவித கருவிகளை உள்வாங்கிக் கொண்டு, உயர்ரக இருதய சிகிச்சையை மக்களுக்கு கொடுப்பதற்கென்று ரெடியாக இருந்தது. மேலும் அதிநவீன அறுவை சிகிச்சை அரங்கமும், இருதய மாற்று அறுவை சிகிச்சை செய்வதற்கு ஏற்றார் போல நவீனமாக பல கருவிகளை கொண்டிருந்தது. எல்லாவித இருதய பிரச்சனையையும் சமாளிப்பதற்கு ஏற்றவாறு அந்த கட்டிடத்தில் அத்தனை வசதியையும் செய்திருந்தார் டாக்டர் ஸ்ரீதர்.

இன்னொரு கட்டிடம் முற்றிலும் மாறுபட்டு சற்று அமைதியான கலரில் 'சாந்தாம்மா இலவச சிகிச்சை மையம்‘ என்ற பெயர் தாங்கி.. பொருளாதாரத்தில் பின் தங்கிய மக்களுக்கு சேவை செய்ய தயாராக காத்திருந்தது. அது டாக்டர் ஸ்ரீதரும், அவர் மனைவி சாந்தாம்மாவும் ரொம்ப நாளாக ஆசைப்பட்டுக் கொண்டிருந்த ஒன்று. அவரைவிட சாந்தாம்மா அதில் தீவிரமாக இருந்தார். அந்தக் கட்டிடம் கண்ணில் பட்டதும் மனைவியின் ஞாபகம் வர, ஸ்ரீதர் அந்த மிகப்பெரிய மருத்துவமனையின் பின்பக்கம் அமைந்திருந்த அவருடைய பங்களாவிற்கு போன் பண்ணினார்.

'சாந்தா எல்லா ஏற்பாடுகளும் முடிஞ்சிட்டுது. டெக்கரேஷன் எல்லாம் முடிச்சாச்சு. வாசல்ல நீ சொன்ன மாதிரி வாழைமரம், மாவிலை தோரணம் கட்டியாச்சு.. குத்து விளக்கு மட்டும் வீட்டிலிருந்து கொடுத்து விடு.. சாயங்காலம் சரியா 6 மணிக்கு மந்திரியும், மற்ற வி.ஐ.பிகளும் வர ஆரம்பிச்சுடுவாங்க. அதனால நீ ஒரு தடவை வந்து பார்த்துட்டு போயிட்டா நல்லது. ராஜேஷும் இல்லை இன்னைக்குன்னு பார்த்து அவன் கிராமத்துக்குப் போயிருக்கான்..