രണ്ടാമത്തെ കുഞ്ഞിന് ജന്മം നൽകാൻ ഒരുങ്ങുമ്പോൾ

കുട്ടികൾക്കിടയിൽ പക്ഷാഭേദം കാണിക്കാതെ അവർ പരസ്പരം സ്നേഹം മാത്രം അവസാനം വരെ കൈമാറുന്ന രീതിയിൽ അമ്മയാണ് കുട്ടികളെ വളർത്തിയെടുക്കേണ്ടത് എന്ന് പ്രത്യേകം ഓർക്കുക... ശ്രദ്ധിക്കുക.

- പ്രീതാ അജയൻ

രണ്ടാമത്തെ കുഞ്ഞിനെ പ്രസവിക്കാൻ പോകുന്ന അമ്മയുടെ വിഷമമെല്ലാം ആ പുതിയ അംഗത്തിന്റെ വരവോടെ ആദ്യത്തെ കുട്ടിയുടെ മനസ്സ് വാടരുത് എന്നതാണ്. കുട്ടികളുടെ മന സ്സിലെ വിഷമമേറിയ ഈ മാനസികാവസ്ഥയെ മനശാസ്ത്രപരമായി പക്വതയോടെ എങ്ങനെ മറികടക്കാം എന്നതിനെക്കുറിച്ച് അമ്മമാരെ ബോധവതികളാക്കാൻ ഉതകുന്ന ചില പാഠങ്ങൾ നൽകുകയാണ് ചെന്നൈയിലെ പ്രശസ്ത മനഃ ശാസ്ത്രജ്ഞനായ ഡോക്ടർ വെങ്കിടേഷ് മദൻകുമാർ.

1. ആദ്യം അമ്മയാവുമ്പോൾ ഉണ്ടാവുന്ന പ്രതീക്ഷ, സന്തോഷം, താൽപ്പര്യം, പരവേശം ഇവയൊക്കെ രണ്ടാമത്തെ പ്രസവവേളയിൽ അതേ അളവിൽ ഉണ്ടായിരിക്കയില്ല. നിങ്ങൾക്ക് മാതൃത്വം പുതുമയുള്ളതല്ലായിരിക്കാം. എന്നാൽ ജനിക്കുന്ന കുഞ്ഞിന് ഈ ലോകം പുതിയതാണ്. ഉത്സാഹത്തോടുള്ള മാനസികാവസ്ഥയോടുകൂടി തന്നെ രണ്ടാമത്തെ കുട്ടിയേയും സ്വീകരിക്കാൻ തയ്യാറാവുക.

2. രണ്ടാമത്തെ കുട്ടിയെ ഗർഭപാത്രത്തിൽ ചുമക്കുന്ന സമയത്തുതന്നെ വരാനിരിക്കുന്ന ആ പുതിയ ബന്ധത്തെക്കുറിച്ച് നിങ്ങൾ ആദ്യത്തെ കുട്ടിയോട് വളരെ പക്വതയോടെ പരിചയപ്പെടുത്തുക.