പ്രശംസകൾ ആസ്വദിക്കുന്നു; വിമർശനങ്ങളും - നദിയാ മൊയ്തു

എൺപതുകളിലെ സിനിമാനായികാ താരങ്ങളിൽ മലയാളികളുടെ മാത്രമല്ല, തെന്നിന്ത്യൻ സിനിമാ പ്രേമികളുടെ ഒന്നടങ്കം മാനസം കീഴടക്കിയ വ്യക്തിയാണ് നദിയാമൊയ്തു. ആൺകുട്ടികളുടെ മാത്രമല്ല പെൺകുട്ടികളുടേയും ഹരമായിരുന്നു നദിയാ. അന്നത്തെക്കാലത്തെ യുവതികൾ വസ്ത്രധാരണത്തിലും ആഭരണം അണിയുന്നതിലും ഒക്കെ അനുകരിച്ചിരുന്നത് നദിയെയാണ്. അന്നത്തെ ഫാഷൻ സൃഷ്ടാവായിരുന്നു അവർ. വിവാഹാനന്തരം കുടുംബജീവിതത്തിൽ പ്രവേശിച്ച് മികച്ച കുടുംബിനിയായി മാറിയ നദിയ മലയാളത്തിൽ ജയറാമിന്റെ ജോഡിയായി വധു ഡോക്ടറാണ് എന്ന ചിത്രത്തിലൂടെയാണ് തിരിച്ചുവരവ് നടത്തിയത്. ഇപ്പോൾ തെന്നിന്ത്യൻ സിനിമയിലെ മികച്ച അഭിനേത്രിമാരിൽ ഒരാളായി വിലസുന്ന നദിയയെ അടുത്തിടെ കണ്ടപ്പോൾ നൽകിയ അഭിമുഖത്തിൽ നിന്ന്...

- സി.കെ. അജയ്കുമാർ

എങ്ങനെയുണ്ട് മുംബയ് ജീവിതം...?

നദിയാ: സുഖം, സന്തോഷകരം. മുംബൈയാണ് എന്റെ വീട്. അവിടെയാണ് ഞാൻ ജനിച്ചു വളർന്നത്. വീട്ടിൽ എല്ലാവരും മലയാളമാണ് സംസാരിക്കുന്നത്. എവിടെ പോയാലും മനസ്സിൽ എന്റെ ഭർത്താവ്, മക്കൾ, കുടുംബം എന്നിങ്ങനെ മുംബൈ തന്നെയായിരിക്കും. ഞാനൊരു വീട്ടുപക്ഷിയാണ്. വീട്ടിൽ സമയം ചെലവിടുന്നതാണ് എനിക്ക് ഏറെ ഇഷ്ടം. അതുകൊണ്ട് മുംബയ് എന്റെ ആത്മാവ് തന്നെയാണെന്ന് പറയാം. ചെന്നൈയും എനിക്ക് പ്രിയപ്പെട്ട സ്ഥലം തന്നെ. തമിഴിൽ അഭിനയിക്കാനെത്തിയ ആദ്യകാലങ്ങളിൽ ചെന്നൈ എനിക്ക് അപരിചിതമായിരുന്നു. ഭാഷ ഒട്ടും അറിയില്ല. അങ്ങനെയൊരു സാഹചര്യത്തിൽ ചെന്നൈയിലെത്തി പ്രശസ്തിയും എനിക്ക് നല്ലപേരും, അംഗീകാരവും നൽകിയതിൽ തമിഴ് സിനിമയ്ക്ക് നല്ലൊരു പങ്കുണ്ട്. ഇപ്പോഴും ഞാൻ തമിഴ് സിനിമയിൽ ബിസ്സിയാണ്.

തെലുങ്കിലും തമിഴിലുമാണല്ലോ അധികവും സിനിമകൾ ചെയ്യുന്നത്. മലയാളത്തിൽ അധികം ചെയ്യാൻ താൽപര്യമില്ലേ...?

 നദിയാ അങ്ങനെയൊന്നുമില്ല. ഞാൻ പിച്ചവെച്ചത് ഇവിടെ നിന്നല്ലേ? ഇവിടുത്തേക്കാൾ തെലുങ്ക് സിനിമകളിൽ നിന്നും ധാരാളം ഓഫറുകൾ ലഭിക്കുന്നുണ്ട്. അവിടെ പല സിനിമകളും ഹിറ്റാവുന്നുണ്ട്. എന്റെ ഈ പ്രായത്തിലും തെലുങ്ക് ഓഡിയൻസ് നൽകുന്ന സ്വീകരണവും, അംഗീകാരവും അഭിമാനാർഹമാണ്. എട്ടുവയസ്സുള്ള കുട്ടികൾ മുതൽ എൺപതുവയസ്സുള്ളവർ വരെ എന്റെ അഭിനയം ആസ്വദിക്കുന്നു എന്നത് വലിയ അനുഗ്രഹമല്ലേ?