സോഫി ജെർമെയ്ൻ

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

പ്രശസ്ത ഗണിത ശാസ്ത്രജ്ഞയായിത്തീർന്ന മേരി സോഫി ജെർമെയ്ൻ 1776 ഏപ്രിലിൽ ഫ്രാൻസിലെ പാരീസിലാണ് ജനിച്ചത്. ഇലാസ്റ്റിക്ക് സിദ്ധാന്തമുൾപ്പെടെ പല ശാസ്ത്രസിദ്ധാന്തങ്ങൾക്കും തുടക്കം കുറിച്ചവരിൽ സോഫി ജെർമെണ്ട്. പില്ക്കാലത്ത് നിരവധി ഗണിതശാസ്ത്ര കണ്ടുപിടുത്തങ്ങൾക്ക് അടിത്തറ ആയത് സോഫി ജെർമെതന്റെ പ്രവർത്തനങ്ങളാണെന്ന് കരുതപ്പെടുന്നു. എന്നാൽ ഒരു സ്ത്രീ ആയത് കാരണം ജീവിച്ചിരുന്ന കാലത്ത് അവർക്ക് ഗണിതശാസ്ത്രകാരുടെ ഇടയിൽ വേണ്ടത്ര പരിഗണന ലഭിച്ചിരുന്നില്ല.

ധനികനായ ഒരു പട്ടുവ്യാപാരിയുടെ മകളായിരുന്നു സോഫി ജെർമെയ്ൻ. അച്ഛൻ അംബ്രോസ് ഫ്രാങ്കോയിസ് രാഷ്ട്രീയത്തിലും സജീവമായിരുന്നു. രാഷ്ട്രീയം വിട്ടശേഷം അദ്ദേഹം ഒരു ബാങ്കിന്റെ ഡയറക്ടറായി സേവനം ചെയ്തിട്ടുണ്ട്. സോഫിക്ക് മൂത്തതും ഇളയതുമായി രണ്ടു സഹോദരിമാർ ഉണ്ടായിരുന്നു.

സോഫിക്ക് പതിമൂന്നു വയസ്സുള്ള കാലത്ത് ഫ്രഞ്ച് വിപ്ലവം അതിന്റെ പാരമ്യത്തിലായിരുന്നു. വിപ്ലവകാരികൾക്കിടയിൽ പെടാതെ മാതാപിതാക്കൾ അവളെ വീട്ടിൽ സംരക്ഷിച്ചു. പുറത്തിറങ്ങാൻ കഴിയാതായ ആ വിരസകാലം സോഫി തന്റെ പിതാവിന്റെ വിപുലമായ ലൈബ്രറിയിലെ പുസ്തകങ്ങളുമായി ഇടപെട്ട് കഴിച്ചുകൂട്ടി. ആ സമയം ചില സ്വകാര്യ അദ്ധ്യാപകരുടെ സഹായവും അവൾക്ക് ലഭ്യമായിരുന്നു.