കാര്യക്ഷമതയുടെ മാസ്റ്റർ

സി.പി.എം സംസ്ഥാന സെക്രട്ടറി ഗോവിന്ദൻ മാസ്റ്റർ സപ്തതിയുടെ നിറവിൽ

- സജിൽ ശ്രീധർ

എം.വി. ഗോവിന്ദൻ മാഷ് സി.പി.എം. സംസ്ഥാന സെക്രട്ടറി പദത്തിലേ കടന്നുവരുമ്പോൾ ആരുടെയെങ്കിലും പകരക്കാരനോ അഥവാ സാങ്കേതികമായി ആ സ്ഥാനം അലങ്കരിക്കാൻ പാർട്ടി ചുമതലപ്പെടുത്തിയ ഒരാളോ മാത്രം ആയിരുന്നില്ല. മറിച്ച് അതിന് മാനങ്ങൾ നിരവധിയാണ്. ഇ.എം. എസി നെ പോലെ ഒരു കാലത്ത് പാർട്ടിയിലെ ശക്തിദുർഗങ്ങളായിരുന്ന നേതാക്കന്മാർ മുന്നോട്ട് വച്ച മൂല്യാധിഷ്ഠിത രാഷ്ട്രീയ സമീപനങ്ങളുടെ പിൻതുടർച്ചക്കാരൻ എന്ന നിലയിലാണ് അദ്ദേഹത്തെ പൊതുസമൂഹം ഉറ്റുനോ ക്കുന്നത്. ഏഴ് പതിറ്റാണ്ട് പിന്നിടുന്ന ജീവിതത്തിന്റെ ഒരു ഘട്ടത്തിലും അഴിമതിയുടെ കറപുരളാത്ത, കേവലം കാമ്പില്ലാത്ത ഒരു അഴിമതി ആരോപണം പോലും നേരിടേണ്ടി വന്നിട്ടില്ലാത്ത വിധം സുതാര്യവും നീതിപൂർവകവും ആദർശാത്മകവുമായ പൊതുജീവിതത്തിന് ഉടമയാണ് ഗോവിന്ദൻ മാസ്റ്റർ.

ലെബ്രറിയനായി ജീവിതം ആരംഭിച്ച മാസ്റ്റർ ആ ഹ്രസ്വ കാലയളവിൽ തന്നെ വായനയുടെ വലിയൊരു ലോകത്ത് അഭിരമിച്ചു. നിരതരമായ വായനയിലൂടെ സ്വായത്തമാക്കിയ അറിവ് അദ്ദേഹത്തിന്റെ കാഴ്ചപ്പാടുകൾ വികസ്വരമാക്കി. ഏത് വിഷയത്തെയും കാര്യ കാരണ സഹിതം യുക്തി പൂർവമായി അപഗ്രഥിക്കാനും വിശകലനം ചെയ്യാനുമുള്ള  കഴിവ് ലഭിച്ചു. ഉപജീവനാർത്ഥം സ്കൂളിൽ കായികാദ്ധ്യാപകനായിരുന്ന മാസ്റ്ററുടെ ഇഷ്ട വിനോദം ഫുട്ബോൾ കളിയാണെന്ന് പറയപ്പെടുന്നുണ്ടെങ്കിലും പൊതുരംഗത്തെ ചില ഗോളുകളിലായിരുന്നു അന്ന് അദ്ദേഹത്തിന്റെ ശ്രദ്ധ പതിഞ്ഞത്.

പൊതുപ്രവർത്തനത്തിൽ തിരക്കേറിയപ്പോഴും അദ്ദേഹം വായന കൈവിടാതെ അറിവിന്റെ ചക്രവാളങ്ങൾ വികസിപ്പിച്ചുകൊണ്ടിരുന്നു. ഈ വൈജ്ഞാനിക പശ്ചാത്തലമാവാം പാർട്ടി സഖാക്കൾക്ക് ക്ലാസ് എടുക്കുന്ന തലത്തിലേക്ക് അദ്ദേഹത്തെ വളർത്തിയത്. മാസ്റ്ററുടെ ക്ലാസുകൾക്ക് വ്യാപകമായ സ്വീകാര്യതയുണ്ടായി. സമാനദൗത്യം നിർവഹിച്ചിരുന്ന മറ്റ് പലരേക്കാൾ അത് പ്രകീർത്തിക്കപ്പെട്ടു. അങ്ങനെ ഒരേ സമയം സൈദ്ധാന്തികൻ എന്ന നിലയിലും പ്രായോഗിക രാഷ്ട്രീയക്കാരൻ എന്ന നിലയിലും അദ്ദേഹം അംഗീകരിക്കപ്പെട്ടു.