மவுத் வாஷ்...புற்றுநோய் அபாயம்?

இன்றைய நவீன உலகில் பல் சுத்தப்படுத்த வித விதமான பேஸ்ட், பிரஷ், வாய் கொப்பளிக்க உதவும் ரசாயன திரவங்கள் (மவுத் வாஷ்) பயன்பாட்டில் இருக்கிறது. இதைப் பயன்படுத்தும்போது கிருமிகள் நீங்கும் என்ற உத்தரவாதம் அளிக்கப்படுகிறது.

- எஸ்.ரவீந்திரன்

இது வாயில் உள்ள துர்நாற்றம், ஈறு அழற்சி, பல் சொத்தை போன்றவற்றைத் தடுக்கும் என விளம்பரப் படுத்தப்படுகிறது அதில் மவுத் வாஷ்கள் பல வகைகளாக உள்ளன. அவற்றில் சில ஆல்கஹால் கலந்தவை, சில ஆல்கஹால் இல்லாதவை. சில மவுத் வாஷ்கள் ஈறு அழற்சியைத் தடுக்கும் பண்புகளைக் கொண்டுள்ளன. சில மவுத் வாஷ்களில் ஃப்ளூரைடு சேர்க்கப்பட்டுள்ளது. இது பற்களில் பசை படிவதைத் தடுத்து, பல் சொத்தையைத் தடுக்கிறது.

அதேநேரம், மவுத் வாஷ் பயன்படுத்தும் போது, வாயில் எரிச்சல் அல்லது வேறு ஏதேனும் அசௌகரியம் ஏற்பட்டால் பயன்படுத்துவதை நிறுத்த வேண்டும். குழந்தைகளுக்கு கொடுக்கும் போது, அவர்கள் மவுத் வாஷை விழுங்கிவிடாமல் பார்த்துக் கொள்ள வேண்டும். கர்ப்பிணிப் பெண்கள் மற்றும் பாலூட்டும் தாய்மார்கள் இதைப் பயன்படுத்துவதற்கு முன், தங்கள் மருத்துவரை அணுகி ஆலோசனை பெற வேண்டும் ... இப்படியான ஆரோக்கிய ஆலோசனைகளும் வழங்கப்பட்டு வருகின்றன.

இந்த நிலையில் பெல்ஜியத்தை சேர்ந்த ஆண்ட்வெர்ப் மருத்துவ நிறுவனத்தை சேர்ந்த ஆய்வாளர்கள், பிரபல கூல் மின்ட் நிறுவன மவுத் வாஷை சோதனைக்கு உட்படுத்தினர்.

அந்த சோதனையின்போது, கூல் மின்ட் ரக மவுத் வாஷை அதிகளவில் பயன்படுத்தினால் உணவுக் குழாய் மற்றும் பெருங்குடல் புற்றுநோய் ஏற்பட வாய்ப்புள்ளது தெரியவந்துள்ளது.