പിൻവിളിയുടെ സ്വപ്നധാര

ജലധാരകൾ ഏറെയുണ്ട് റോമിൽ. അവയിലേറ്റവും പ്രൗഢവും പ്രശസ്തവുമാണ് ത്രേവി ഫൗണ്ടൻ. ശിൽപചാതുരി വഴിഞ്ഞൊഴുന്ന, ചരിത്രപ്രാധാന്യമുള്ള ആ ജലധാരയ്ക്കരികിൽ...

- JOLLY AUGUSTINE

Just the fountains are enough to justify a trip to Rome' -Shelley

വിഖ്യാതനായ ഇംഗ്ലീഷ് കവി ഷെല്ലി റോമിലെ ജലധാരകളെക്കുറിച്ച് പറഞ്ഞുവെച്ചത് ഇങ്ങനെയാണ്. ത്രേവി  ഫൗണ്ടൻ കാണുമ്പോൾ ആ പറഞ്ഞത് യാഥാർഥ്യമാകുന്നു.

ലോകത്തിലെ ഏറ്റവും പ്രശസ്തമായ ജലധാര ത്രേവി, റോമിലെത്തുന്ന സഞ്ചാരികളെ മാടിവിളിക്കുന്നു. നൂറ്റാണ്ടുകളുടെ ചരിത്ര പടവുകളിലൂടെ ത്രേവിയുടെ ഒഴുകിയിറങ്ങിയ ഓളങ്ങൾക്കുമുണ്ട് പറയാൻ കഥകളേറെ. ഗ്രീക്ക്-റോമൻ വാസ്തുശിൽപ പ്രൗഢിയും ജ്ഞാനോദയ കാലഘട്ടത്തിന്റെ സ്മരണകളും, ചിതറിത്തെറിച്ച് പതിക്കുന്ന സംശുദ്ധ ജലകണങ്ങളും ഈ ജലധാരയുടെ യശസ്സ് വാനോളമുയർത്തി. കാലാന്തരങ്ങളിൽ സഞ്ചാരികൾ ആ കാല്പനികസൗന്ദര്യത്തെ വാഴ്ത്തി ത്രേവിക്ക് ചുറ്റും വലംവെച്ചു. ഇന്നും യാത്രാമൊഴിയായി അവർ എറിയുന്ന നാണയത്തുട്ടുകൾ ജലാശയ നീലിമയിൽ ഓളങ്ങളുണർത്തുന്നു.

റോമിലെ വിഖ്യാതമായ സെന്റ് പീറ്റേഴ്സ് ബസലിക്കയും ലോകാദ്ഭുതമായ കൊളോസിയവും മറ്റ് അനവധി സ്മാരകങ്ങളും കണ്ട് സഞ്ചാരികൾ ത്രേവിയിലേക്കെത്തുന്നു. ഈ ജലധാരയിലെ സംശുദ്ധ തീർഥത്തിലേക്ക് എറിയുന്ന നാണയങ്ങൾ, റോം തിരികെ വിളിക്കുമെന്ന വിശ്വാസം മുറുകെ പിടിക്കുന്നു...

സുവർണ സംവത്സരങ്ങളുടെ ഓർമ്മകൾ പേറുന്ന രണ്ടായിരത്തിൽപ്പരം ജലധാരകൾ ഈ നഗരത്തിൽ ഉണ്ടെന്നാണ് കണക്ക്. പുരാതന റോമാക്കാർ രാജകൊട്ടാരങ്ങളുടെയും പ്രഭുമന്ദിരങ്ങളുടെയും ഉദ്യാനങ്ങളിൽ ആഢ്യത്വവും ഭംഗിയും ഊട്ടിയുറപ്പിക്കാൻ ജലധാരകൾ നിർമിച്ചിരുന്നു. അതുതന്നെയാകാം "റോമിലേക്ക് ഒരുയാത്രയെ ന്യായീകരിക്കാൻ അവിടത്തെ ജലധാരകൾ മാത്രം മതിയെന്ന് വിശ്വകവി ഷെല്ലി കുറിച്ചത്. പഴമയുടെ തനിമ ഒരു കാൻ വാസിലെന്നോണം വരച്ചിട്ട റോമാനഗരം മഹാമാരിയുടെ ഇരുണ്ടനാളുകൾ മറന്നു തുടങ്ങിയിരിക്കുന്നു. റോമിലെ പ്രധാന തെരുവീഥികളിലേക്കും പാതയോരങ്ങളിലേക്കും സഞ്ചാരികൾ തിരിച്ചെത്തിയിരിക്കുന്നു. ത്രേവി ഫൗണ്ടന് അഭിമുഖമായുള്ള പ്യാത്സ ദിവിയി ne (Piazza di Trevi-Trevi Square) കോഫി ബാറുകളും റസ്റ്റോറന്റു കളും സോവനീർ കടകളും സഞ്ചാരികളാൽ വീണ്ടും സജീവമാണ്.

ഇളംകാറ്റിൽ ചത്വരമാകെ കോഫിയുടെ ഗന്ധം പടർന്നു. യൂറോപ്യൻ തെരുവുകൾക്ക് കോഫിയുടെ ഗന്ധമാണെന്ന് ആരോ പറഞ്ഞ ഓർമകളിൽ മനസ്സ് അകലേക്ക് നീണ്ടു. കാപ്പിച്ചെടികളെ ചുറ്റിപ്പറ്റി, ജന്മനാടായ വയനാട്ടിൽ എത്തിയ പ്രതീതി. മൂന്നുപതിറ്റാണ്ട് നീളുന്ന പ്രവാസത്തിലും ഗൃഹാതുരത്വം ഇന്നും കൂടെയുണ്ട്.