திருப்பம் நிறைந்த கட்டத்தில் பயணிக்கிறது இலங்கை

இலங்கைப் பொருளாதாரம் முன்னேற்றத்தை நோக்கி நகர்வதாகவும் அதற்காகக் கையாளப்படும் பொறிமுறைகள் பாராட்டத்தக்கவை எனவும் உலக வங்கி, அமெரிக்க வர்த்தகப் பிரதிநிதிகள் குழு என பலதரப்பட்ட அமைப்புகள் தமது திருப்தியை வெளியிட்டுள்ளன என்றாலும் இலங்கை பொருளாதார வளர்ச்சிக்கான முன்னெடுப்புகள் தொடர்பில் அதிக அக்கறை காட்டப்பட வேண்டுமென்ற பொதுவானதொரு பரிந்துரை முன்வைக்கப்பட்டுள்ளது.

- நிவேதா அரிச்சந்திரன்

பொருளாதார வளர்ச்சியை அடைந்துகொள்ளும் பொருட்டு இலங்கை அரசாங்கத்தால் பல முனைகளில் அதற்குரிய காய்நகர்த்தல்கள் மேற்கொள்ளப்பட்டு வருவதாகவே தெரிவிக்கப்பட்டாலும் அவை எந்தளவு தூரம் வேகமாக முன்னெடுக்கப்படுகின்றன என்பதிலேயே குறித்த திட்டங்களின் வெற்றி தங்கியுள்ளது.

நாட்டின் மொத்த உள்நாட்டு உற்பத்தி 2024ஆம் ஆண்டின் இரண்டாம் காலாண்டில் 2,749,504 மில்லியன் ரூபாவிலிருந்து 2025ஆம் ஆண்டின் இரண்டாம் காலாண்டில் 2,883,669 மில்லியன் ரூபாவாக அதிகரித்துள்ளதாகப் புள்ளிவிபரவியல் திணைக்களம் அறிவித்திருக்கிறது. அத்துடன் 2025ஆம் ஆண்டின் இரண்டாம் காலாண்டில் ஆண்டுக்கு ஆண்டு மொத்த உள்நாட்டு உற்பத்தி வளர்ச்சி வீதம் நேரான வளர்ச்சி 4.9 சதவீதமாகப் பதிவாகியுள்ளது என்றும் தொகை மதிப்பு மற்றும் புள்ளிவிபரத் திணைக்களம் சுட்டிக்காட்டியுள்ளது.

2025ஆம் ஆண்டின் இரண்டாம் காலாண்டுக்கான உற்பத்தி அணுகுமுறையால் நடப்பு, நிலையான விலையில் மதிப்பிடப்பட்ட மொத்த உள்நாட்டு உற்பத்தி மற்றும் அத தொடர்பான பொருளாதாரக் குறிகாட்டிகளைத் தொகைமதிப்பு மற்றும் புள்ளிவிபரத் திணைக்களம் வெளியிட்டுள்ளது.

மேலும் 2025ஆம் ஆண்டின் இரண்டாம் காலாண்டில் ஆண்டுக்கு ஆண்டு மொத்த உள்நாட்டு உற்பத்தி வளர்ச்சி வீதம் நேரான வளர்ச்சி 4.9 சதவீதமாகப் பதிவாகியுள்ளது. விவசாயம், கைத்தொழில் மற்றும் சேவை நடவடிக்கைகள் அனைத்தும் முறையே 2.0 சதவீதம், 5.8 சதவீதம், 3.9 சதவீதம் என்று உயர்வடைந்துள்ளன என்றும் திணைக்களம் குறிப்பிட்டுள்ளது.

அந்த வகையில் 2025ஆம் ஆண்டின் முதல் இரு காலாண்டுகளில் பொருளாதார நடத்தையானது குறிப்பிடத்தக்க அளவில் திருப்திகரமானதாக அமைந்திருந்தாலும்கூட, பொருளாதார வளர்ச்சியானது போதுமான வகையில் முன்னெடுக்கப்படவில்லை என்பதே பொருளாதார நிபுணர்களுடைய ஒப்பீடாகவுள்ளது.